弱質纖纖的無綫藝人丁樂鍶（丁丁）羨慕擁有健美身段的女生，她更封美國天后Rihanna為完美女神，早前丁丁潮玩TRX Rip Trainer鍛煉肌肉，誓要脫離弱質女流行列！

首次玩TRX Rip Trainer的丁丁高呼有難度，皆因唔夠力就會Hold唔住。

Kettlebell有不少揮壺鈴動作，丁丁建議最好戴手套，以防跣手造成意外。

丁丁輕易舉起Medicine Ball，似乎難度唔高噃！

丁丁獲教練Jason親自指導，咁玩Rip Trainer就冇難度啦！

身形纖瘦的丁樂鍶最近積極健身，與私人教練Jason潮玩TRX Rip Trainer配合不同動作訓練肌肉，她表示平日也會做運動，以跑步為主，但因她早前不慎傷腳，故暫停跑步一段時間，最近她在公司安排下學跳K-Pop，但由於其身形較瘦削及缺乏肌肉，練習時頗為吃力，她希望可以靠健身收靚線條及增強力量：「我都好想操到有馬甲線，大腿同手臂肌肉結實啲。」

增強平衡協調

Rip Trainer採用拉桿及阻力繩，要雙手握桿做出不同動作，而桿子連着一條阻力繩，走得愈遠阻力愈大，可以分別訓練兩邊肌肉，有助增加平衡性、身體協調性、力量及靈活性等，而阻力繩又分為大中小級，中級阻力繩的阻力可達30kg。首次做TRX Rip Trainer的丁丁坦言Rip Trainer也有一定難度，她做了幾組不同動作已非常疲累：「都幾難做，最難係做划船嘅動作，因為我對手唔夠力，不過教練話唔需要Hold好耐，只要慢慢做，做多幾次就可以！」其後她還試玩了Kettlebell及Medicine Ball，其實兩者與啞鈴近似，利用一定重量的健身器材配合適當動作，比起只做動作，收效更大。丁丁玩後提醒大家：「玩Kettlebell嘅時候有唔少揮動嘅動作，所以最好戴埋手套去玩，冇咁易跣手，仲要留意身邊有冇人，否則唔小心鬆咗手就好易造成意外。」

拒絕節食減肥

雖然不少人認為瘦等於美，但丁丁反而欣賞擁有肌肉及線條美的女性，她大讚美國歌手Rihanna的身材弗爆：「我覺得Rihanna嘅身形真係好完美，唔係瘦到皮包骨咁，瘦得嚟有肌肉同線條，我以佢為目標努力，至於男仔我就鍾意彭于晏嘅類型！」問到會否對肌肉男特別欣賞，她笑言過分大隻反而會嚇怕她，但會對鋼條形加分。自問並非運動型的她，覺得做運動是生活中不可或缺的一環：「做運動可以令身體健康，增強心肺功能，人都會靚啲，我唔主張節食同禁食減肥，因為我太鍾意食，所以我會選擇做運動。」閒時喜歡跑步的她又自爆曾參加半馬拉松賽事，但感覺麻麻：「我當時係為減肥而跑步，並唔係為比賽，所以參加比賽都係志在參與，比賽當日空氣比較差，而且當時冇特別針對賽事而練跑，所以跑得辛苦，之後都冇再參加！」

TRX Rip Trainer

桿子連着一條阻力繩，雙手握桿做出不同動作，訓練兩邊肌肉，可增加平衡性、身體協調性、力量及靈活性。

Kettlebell

與啞鈴一樣有一定重量，透過揮動動作可令全身肌肉變得更結實，提升柔軟度及耐力，打造完美身材。

Medicine Ball

健身球的一種，原理亦與啞鈴一樣，透過舉起動作多角度鍛煉肌肉及平衡性。

文：名人組 攝：黎志輝