張敬軒預告在音樂會上挑戰尺度，表演「有味歌」，開騷前他更到大笪地訓練「口技」，幫手叫賣韓國部隊鍋，獲封「Top Sales」。

軒仔大賣關子，預告將在直播音樂會上唱有味歌。

為音樂會綵排的軒仔被傳媒圍住，但仍專心練歌。

張敬軒昨日為本月16日假麥花臣場館舉行的「KKBOX LIVE：張敬軒ONE DAY」音樂會進行綵排，屆時將會在網上直播。由於入行以來首次直播音樂會，將會翻唱容祖兒、五月天、孫燕姿及王菀之等人的經典歌曲，令軒仔心情特別緊張。

擺攤極速清貨

他自爆當晚壓軸一曲將挑戰底線，大玩「有味歌」：「揀咗首好爆嘅歌，想唱好耐，礙於尺度問題一直唔敢唱，但要賣個關子唔講得係咩歌，總之『有味』嘅！」軒仔還透露有朋友在大學大笪地競投了一個攤位，前晚「落區」幫手叫賣，成功吸引不少客人：「幫手賣韓國部隊鍋，我冇份下廚，應該唔會肚屙。我一個人睇攤嗰陣有三種貨品都沽清，我問佢哋：『點解我自己啲嘢就咁難賣？』」

股票蝕到仆直

問到可會再次勾起「老闆癮」？軒仔搖頭說：「唔啦！自從廣州嗰壇嘢收檔後，再做生意都要謹慎。」他又表示在股市慘蝕收場：「我買咩都蝕，今年一入市就輸到仆……直，輸咗六位數。以為好易啦！買入賣出，點知睇少個零，都係畀心機做嘢啦！」

文：音樂組　

攝：司徒國榮