黃智雯為新劇拍攝指導李思捷踩單車的場面,原來她卻一竅不通,最終惟有改劇本。她以四輪單車代步,論論盡盡的她自嘲不能對有轆的東西產生感情!

黃智雯踩單車時多次失平衡險跌倒,劇組惟有改劇本遷就。

換上四輪車的黃智雯被李思捷取笑,認真失威!

黃智雯與李思捷昨日於大埔為新劇《爸B有話兒》開工,拍攝一場智雯被男友逼婚三次後,思捷拉她出走踩單車散心的戲。劇本原要求智雯教思捷踩單車,惟坐上單車後的她不時大叫,根本平衡不了,最終劇組人員「投降」改劇本,變為他倆一同學習踩單車,更即席為她找來四輪單車,場面惹笑。

事業行先未想結婚

事後智雯接受訪問時透露,小時候懂得踩單車,但後來因一次跌倒產生恐懼:「我最好唔掂有轆嘅嘢,揸車都麻麻,真係唔可以同有轆嘅嘢產生感情。(男友識唔識踩?)佢仲鈍過我。(男友有冇向你逼婚?)真係冇,但我就事業行先,計劃都未有,劇入面講我唔識處理感情,亦唔知心底鍾意邊個,但現實生活我就唔鍾意拖泥帶水。」

陳國邦曾給予鼓勵

與思捷繼《老婆大人II》後再度合作,智雯笑指當年曾被他一副嚴肅樣嚇倒,後來因「胡說八道會」而熟落,最近合作才有火花。她笑說:「佢會成日爆肚,好在我都接得住。(有冇親熱戲?)有蜻蜓點水式!」對於前輩陳國邦離巢,她表示雖然從未合作,但會欣賞他的舞台劇,年前一次偶然機會下於公司巧遇,他主動鼓勵,令智雯印象深刻:「佢唔介意Share經驗,真係好好!我覺得演員生涯要有衝擊,我都需要啲經歷先拍到嘢出嚟。(公司多人走?)咁都好多前輩會返嚟拍劇,好似之後我都有機會同方中信、廖啟智呢啲好戲之人合作,呢個組合絕對係夢寐以求!」

文:影視組