蓋鳴暉昨日出席「鳴芝聲劇團25周年生日會」，更獲無綫高層曾勵珍到賀。問到陳國邦離巢一事，曾勵珍直言未感可惜，更表示雙方可以再合作！

蓋鳴暉的生日願望是繼續將粵劇發揚光大。

曾勵珍（左）到賀蓋鳴暉生日時表示，對陳國邦離巢未感可惜。

羅敏莊表示老公陳國邦不排除會再與無綫合作。

蓋鳴暉昨日出席「鳴芝聲劇團25周年生日會」，同於本月3日生日的蓋鳴暉笑言與劇團關係唇齒相依。問到生日願望，她希望粵劇能繼續發展：「希望劇團可以延續使命，將藝術、粵劇傳統發揚光大。25周年真係唔容易，好需要大家支持。」

「TVB培養咗好多人」

而其好友兼無綫戲劇總監曾勵珍更特別到賀，問到陳國邦離開無綫一事，她說：「我都唔了解，不過唔緊要，人各有志，TVB 48周年培養咗好多人，依家都仲培養緊新人。（覺得可惜？）唔可惜嘅，因為佢仲活躍喺呢個圈子，話唔定佢玩完一輪返嚟，公司都歡迎佢。公司資源好多，如果協調到，都可以再次合作。（關菊英唔續約？）佢風花雪月緊，唔想咁困身。（公司有咩方法留人？）可以留嘅都係兩個字『誠意』，佢哋出過去就會發現公司真係好舒服。」

身在台灣的陳國邦對曾勵珍的言論未有回應，而他的太太羅敏莊則說：「咁佢講嘅全部都係事實，我唔覺得佢係Mean（刻薄），我認識嘅曾勵珍係一個好人。有一次去慶功，我哋帶小朋友一齊去，佢都叫傳菜嘅人小心啲，咪整親小朋友，小朋友瞓咗都叫人咪咁大聲。」

敏莊：唔排除再合作

問到會否怕老公嬲？她說：「阿邦唔係一個容易嬲嘅人，即使佢寫信時都唔係嬲，唔排除將來再合作。」

文：影視組