古巨基巡唱首站前晚在深圳正式開鑼，愛搞氣氛的他擺古太Lorraine上枱，除了大晒拍拖到結婚的甜蜜合照外，獻唱韓文情歌冧太太時更笑言80歲前不會讓她有飽飯食，唔怕返屋企罰跪玻璃！　

基仔苦練半首韓文歌冧老婆，但又話唔畀飽飯佢食，真係一啖沙糖一啖……

基仔偷偷晒與老婆的陳年蜜照，好Sweet呀！

舞台運用3D裸視效果，唔使眼鏡都睇到3D！

古巨基前晚舉行《我們》世界巡迴演唱會首場深圳站，全場座無虛席，基仔坐時光機在半空登場，接連演唱多首金曲，又改編不同年代有代表性的經典歌，令觀眾聽出耳油！這次巡唱的製作費逾千萬人民幣，服裝和舞台設計落足心思，基仔穿上結婚蛋糕燕尾服、黃金流蘇舞王裝等六套服裝，更大玩舞台3D裸視華麗特效，雲、星星、巨型獅子都栩栩如生！而基仔父母和外父外母均有捧場，他獻唱《父親》前，大屏幕映出他親手寫下與父母的談話，他指為怕父母擔心而報喜不報憂，令觀眾大為感動！巡唱亦不乏爆笑位，基仔特別為愛妻Lorraine苦練韓文歌，唱出她最愛的韓劇《來自星星的你》的主題曲《My Destiny》，正當大家被其甜蜜打動，基仔只唱了半首歌便搞笑地說：「有朋友同我講，老婆未到80歲之前咪畀佢食飽，所以我唱住半首先！」

瞞住古太晒蜜照

其後基仔在太太不知情下與觀眾分享兩人合照，由1995年的拍拖相至去年的婚紗相，都見證兩人的情路，認真Sweet到爆！不過他再發揮搞笑本色，以幽默手法親述與太太相識至相戀的過程，令觀眾笑爆嘴！

文：音樂組