NBA「波神」米高佐敦（MJ）繼大前晚夜襲中環後，前晚又再出動老蘭夜蒲，更用電筒「獵女」，睇啱心水即主動出擊！其中一位被「點燈」的低胸女更用背脊和臀部緊貼MJ大跳辣身舞！

對夜蒲食過翻尋味的MJ行步路都好似跳舞咁，風騷過人！

MJ用電筒揀中露背女後，再埋身咬耳仔兼跳辣舞。

去完廁所，MJ又「照」中另一低胸女，再次Take Action同對方「磨爆」！

難得見到MJ，一眾顧客當然即刻影低，有圖有真相吖嘛！

近日秘密抵港的NBA「籃球之神」米高佐敦（Michael Jordan），前晚在中環PMQ用膳後離開餐廳，大批在場守候的粉絲甫見「波神」即蜂擁而上，MJ在多名保安護送下登車，再轉場去夜店Dragon i夜蒲，該店特別劃分專區供MJ玩樂，更安排8至9名保安看守，以免他受到滋擾。

由頭照落腳

穿上西裝褸的MJ，初時只是跟朋友傾偈食雪茄，吹水約一小時後，他見到數名性感洋妞跳舞時，終於主動出擊，不但脫下外套，又突然拿出電筒照向幾位索女，猶如「照田雞」般由頭照到落腳，未幾他睇中一名身穿露背衫的洋妞，於是主動埋身咬耳仔，之後還一起跳舞。

Pat Pat貼到實

其後MJ人有三急，在多名保安陪同下前往洗手間，沿途有不少顧客即拿出手機拍照和大叫他的名字，MJ亦報以親切笑容。完事後MJ返回專區繼續玩，但他未有理會先前的露背女，反而取出電筒另尋目標，並隨即睇中一位身穿低胸背心的洋妞，被MJ「點燈」的低胸背心女全程笑到四萬咁口，又不時用背脊及臀部貼實MJ，不斷「磨爆」跳辣身舞，兩人跳得十分盡興，可見52歲的MJ依然精力旺盛！玩至凌晨3時，MJ在保安陪同下離開夜店，並乘七人車返回酒店休息。

文、攝：追蹤組