近日再度活躍樂壇的曹敏寶，轉型做發燒碟歌手並推出新碟。她更雄心壯志希望打破宿命，將新歌加入年輕元素！

曹敏寶當年轉行做化妝師，幸得伯樂將她帶回「老本行」。

曹敏寶重返樂壇，並轉型做發燒碟歌手。

曹敏寶想舉辦粉絲見面會，但暫未有計劃開音樂會。

曹敏寶於2011年舉行新歌發布會，家姐曹敏莉送上金玫瑰寓意妹妹星途燦爛。

場地：Thai Master（泰斗）

曹敏寶（Abo）近日重返樂壇，轉型做發燒碟歌手推出發燒碟，她自言回憶當時其實已經轉行做化妝師，幸得伯樂將她帶回做「老本行」：「出完第一隻碟，因為公司有問題，我冇宣傳，連頒獎典禮冇去過。之後個監製打嚟話我好似失蹤咗，佢問我有冇興趣出發燒碟，嗰一刻覺得自己仲有人欣賞！」

近日Abo推出新碟《If Love》，主要是講述有關情感的故事，雖然現今發燒碟市場偏向翻唱為主，但身為80後的Abo希望可以帶頭改革，創立新的發燒碟路向：「發燒碟主要係翻唱人哋嘅歌，因為歌迷容易受落啲。（推出自己嘅歌放落隻碟度？）好希望，我有同公司講，點解做發燒碟就要翻唱人哋嘅歌，不如做吓新歌嘅發燒碟啦！但呢個會係一個好大嘅挑戰。（打破宿命？）係呀！都好努力咁做緊呢樣嘢，唱多啲新歌。」

展現動感

自言不追求名利的Abo，只希望將音樂帶給樂迷，除得到家人支持外，她更希望將自己最真的一面給予樂迷：「唔係要幾多個人識我，有幾紅，只係話畀大家聽，我係歌手就足夠。（開音樂會？）雖然大家都係透過聲音去認識我，但其實唔係好多人知我動感一面，想大家都接觸呢個我多啲，想知佢哋對我有咩意見。（搞粉絲見面會？）都想呀！想細細型搞起先，大型音樂會就遲啲先算！」

文：專案組

攝：吳文聰