「千語BB」吳千語與林峯愛得煙韌，但直言從不會主動咀男友！而與她於新片有感情線的黃又南則自嘲「鵪鶉男」，敢愛不敢認。

吳千語

黃又南

於新片有感情線的黃又南及吳千語，大談愛情觀。

吳千語與黃又南在新片《王家欣》合演一對，但故事講述又南情傾的是由盛君飾演的另一位「王家欣」，劇情更會交代千語向又南獻吻求愛；但現實中，千語揚言不會主動咀男仔：「拍戲就試過，但現實點會呀？（向男友林峯錫錫？）都冇啫！（演技有進步，請教過林峯？）我諗係因為戲入面個王家欣有啲似自己，口硬心軟，係做多過講嘅行動派，譬如佢鍾意又南，咁陪佢搵王家欣就變咗佢心願！」

接「呼吸」電話喊驚

問到會否鍾意癡心男？千語卻說:「細個試過收好多只有呼吸聲嘅電話，後尾輾轉知隔籬校有人知道我電話。（暗戀你？）根本唔知邊個！（讀書時已經係校花？）唔係，嗰時我又黑又瘦，冇人追，所以呢件事覺得好奇怪同恐怖！」

靠天佑幫手示愛

又南則不認為癡心是「恐怖」，他說：「我冇戲中男主角等得咁耐，但試過等一個女仔幾年，佢唔係呢行，我一直等，但佢避我，佢冇可能唔知我鍾意佢，但後來佢有家室，冇理由要人離婚，咁我就放棄。感情方面我好小學雞、鵪鶉男，試過喺日本留學暗戀個女仔兩年，徐天佑睇唔過眼，用我電話同個女仔表白，點知人哋話有男友，真係好Hurt，但都要接受，依家同個女仔仲係朋友。」

場地：Bar Ginger

吳千語：髮型：Jo Lam@ Queen's Pi

化妝：Zoe Fan makeup

服裝：Sacai@Landcrawford

黃又南：髮型：Louis Tse@POPEIGHT

化妝：Henry Tse

服裝：Club Monaco

文：影視組

攝：樊愛慈