導演錢國偉與陳宛蔚昨日筵開逾51席完婚，一班星級兄弟團鄭伊健、方力申、洪天明及錢嘉樂等為助新郎抱得美人歸，不惜化身「缽缽超人」，將俗稱缽仔糕的Nude Bra蒙面呃Like，更要吞昆蟲兼反串扮「A貨新娘」！
錢國偉攬實陳宛蔚合照，又即場咀嘴，同大家「婚」享喜悅！
錢國偉（左）與 陳宛蔚
一班星級兄弟團助錢國偉接新娘，甘願被玩殘，夠晒義氣！
錢國偉被迫抱起易服錢嘉樂，睇見都辛苦！
昨日是錢國偉與陳宛蔚新婚日子，早上約十時，新郎穿金啡色禮服與伴郎方力申、兄弟團鄭伊健、謝天華、林曉峰、洪天明、黎諾懿、阮兆祥及錢嘉樂等接新娘，可謂過五關斬六將，事關江美儀、莊思敏、賈曉晨（JJ）及周家蔚等姊妹團準備不少辣招伺候！
嘉樂遲到食蟲
兄弟團先要品嘗一味由苦瓜、芥辣及朱古力溝成的「同甘共苦」，又要模仿新人婚照擺甫士，姍姍來遲的嘉樂更被迫男扮女裝變山寨新娘，被錢國偉從後抱起。
不過最「裸」命的是，天明要將Nude Bra放在面上與小方合照，並上載社交網站呃Like，要在兩分鐘內贏得二千個Like才成功！雖然最終挑戰失敗，但一班兄弟願意接受懲罰吃鹹竹蜂。其後錢國偉向陳宛蔚發表愛的宣言，最終成功感動新娘，一對新人肉緊咀嘴，再拉大隊出發到男家向長輩敬茶。
一對新人在下午到達酒店婚宴場地，二人再次嘴對嘴讓傳媒拍照，穿低胸婚紗的新娘大晒手上三卡婚戒，與兄弟團互插手指公合照時，他們更大講黃色笑話：「指公爛！」新郎即笑說：「呢招叫扯到行！」一對新人又自爆兄弟團在接新娘環節時摸門釘，陳宛蔚笑說：「佢哋去咗落一層，即係尋晚住嗰間，狂敲門冇人應，天明打畀家蔚先知去錯房。」她表示過程中有不少感人場面，但每次想落淚時，一班兄弟便噓聲四起。
陳宛蔚又霸氣揚言要掌管老公的屋契及戶口做財政大臣，新郎則表示因忙於工作，要延遲度蜜月計劃，至於造人大計，他稱隨遇而安，新娘則說：「呢一年都係等呢日，聽日嘅事聽日先算。」問到可會擔心婚宴上被灌醉？錢國偉笑言「醉」怕曾志偉：「怕同佢一齊瞌眼瞓，兄弟都驚緊！」新娘則預告安排了福祉車送走一班醉貓。
小方亂入 遭誤認新娘
至於伴郎小方笑言與一對新人坐名車出發到男家時，他因與新郎排排坐而一度被途人誤以為是同性婚姻，他只好尷尬點頭，對於錢國偉表示晚宴上要向小方逼婚，迎娶鄧麗欣，小方說：「我唔會搶人風頭，呢啲場合就算男方願意，女方都唔想。」
文：音樂組
