胡定欣花2粒鐘變醜 爛面!
歐陽震華與胡定欣昨日為無綫劇《一屋老友記》拍攝節目巡禮片花,定欣花近兩小時將靚樣化醜變身「剪刀手」,面上滿布疤痕,十分驚嚇。
胡定欣化身《幻海奇緣》的剪刀手,與歐陽震華齊齊嚇人!
滕麗名以女巫造型亮相,收起性感。
性感魔鬼呂慧儀,與歐陽震華齊齊嚇羅蘭。
無綫節目巡禮劇集《一屋老友記》昨日拍攝片花,歐陽震華、胡定欣、呂慧儀及滕麗名化身「愛登士家庭」。當中造型最爆的要數胡定欣,她花兩小時化妝後變身成電影《幻海奇緣》的剪刀手,滿布疤痕的造型相當可怕!問胡定欣可有被造型嚇一跳?她說:「我都同化妝師講可唔可以醜得嚟靚啲呢,一陣去餐廳睇吓有冇人認得我。」她又表示此造型其實是特別為宣傳片而改造。
整親手喊唔停
提到前晚拍攝《城寨英雄》再傷手指公淚灑當場,胡定欣說:「今次同袁偉豪手撞手,手指公向後拗整到虎口,痛到標眼淚,去咗醫院檢查,好彩骨冇事,筋拉傷咗,依家會拍住文戲先。」另一主角歐陽震華則以吸血殭屍造型現身,他說:「戲入面係歡喜冤家,原來定欣喺無綫十幾年,大個女,佢依家啲戲好穩重,係今年視后熱門人選。」
呂慧儀唔慣性感
同場的呂慧儀身穿露膊裝化身性感魔鬼,但已為人母的她坦言對性感服飾感到不習慣:「唔慣,有啲涼意,好耐冇咁性感。」滕麗名則以女巫造型示人。
文:影視組