劉思希「酒」進人生

正忙於拍攝無綫新劇《巨輪II》的劉思希（Lisa），一直在螢幕上以大家閨秀形象示人，原來她平日亦愛品味生活，更將這種優雅格調延伸至舌尖。Lisa自爆起初並非飲得之人：「身邊好多朋友都識飲酒，佢哋成日同我講支酒有好香嘅尤加利葉味、薄荷葉味、野豬味，我覺得佢哋一個二個都吹水唔抹嘴，我乜都聞唔到！」直至遇上「初戀」，Lisa才開始有所體悟：「有年我飲咗一支酒，支酒係用Muscat（麝香葡萄）造，一聞落去就覺得好重玫瑰花味，第一次喺酒度聞到咁香嘅味道，之後先發覺每支酒都有佢獨有嘅香味。」

上堂醉Fun Fun

其後Lisa的品酒興趣大增，拍畢無綫劇《忠奸人》後更趁空檔報讀課程，一嘗「野豬」之味：「用咗1年時間由1級讀到上3級，因為係密集課程，所以每逢星期一、三、五由朝早9點飲到夜晚6點。（唔會醉？）會！每次落堂都醉醉哋，次次都紅酒、白酒、香檳溝住咁飲，特別易醉！（你飲得出野豬味未？）飲得出喇，仲有電油味同燈籠椒味呢啲得意嘅味，其實呢啲味係受葡萄品種、土壤同釀造方式影響，好似勃根地嘅天氣特別惡劣，種出嚟嘅葡萄都有特別嘅味！」她卻暫不考慮讀第4級：「讀第4級就好似讀個Degree咁，要讀兩年，又要寫論文，但畢業可以去法國拎證書，其實都有興趣嘅。（想轉行？）咁又冇，學多樣嘢啫，我讀第3級時啲同學都問過我係咪轉行，因為好多餐廳經理都讀到第3級。」問到上堂時有否艷遇，她說：「飲紅酒多數都係靚仔嚟，但可惜同班同學大多數都名草有主，仲有一對好Sweet嘅Couple一齊學，好羨慕。啲同學開頭唔夠膽同我講嘢，上多幾堂就有人行嚟問我係咪Gillian（《忠奸人》角色），阿Sir叫我答問題都係叫我Gillian，上堂都真係幾開心，返親學都飲到大一大！」

識飲都要識食

談到一支完美的酒，不少人都抱有法國酒格外優秀的觀念，Lisa卻指現實未必如此：「70年代喺巴黎有場法國酒同美國酒大比併，評判係英國同法國人，Blind Tasting，結果紅酒同白酒都係美國贏咗。」法國各大酒莊戰敗後，就以法國酒較含蓄、風味會隨年月而昇華為由，決定30年後以相同的酒重賽：「法國好有信心會贏，點知最後紅酒同白酒都係美國贏，而之前拎第2嘅紅酒就拎第6。但法國酒係一個信心保證，其實都好睇個人口味，就算我同你講支酒味道好奔放，但你唔鍾意都冇用！」她指意大利、西班牙及葡萄牙出產的酒正在冒起：「性價比好好，運一箱過嚟圍起都係兩三蚊歐元一支，嗰度啲人當水咁飲。」

Lisa品酒時又着重食物配搭，如泰國菜忌配濃味紅酒：「單寧味重嘅酒會令啲餸更辣，亦飲唔到酒嘅香氣，濃酒始終配紅肉最好。」

後記：Well-balanced酒徒

由滴酒不沾之人變成品酒好手，Lisa表示除了喜歡美酒的色香味外，更愛上美酒所蘊含的意義：「酒同人生一樣都好講求Balance，如果一方面出色，但其他方面唔得，例如睇得唔聞得，其實都唔夠完美。就好似做人咁得個外表，內在襯托唔夠，都唔係一個Well-balanced嘅人生，各方面都要出色先至係一支好嘅酒！」 文：若瑟 攝：劉斌 場地：IVY