排球隊Loey班主鄧麗欣（Stephy）前晚與隊員進行技術性會議時被搞喊，因她本月15日生日，隊員便為她炮製神秘生日會：「完全唔知，好驚喜！（搞到你眼濕濕？）佢哋好衰，拍咗條片講心底話，令我好有感覺，大家本來素未謀面，有緣分走埋一齊做同一件事，好團結，我個人好感性，對呢啲好眼淺！」

本月15日生日的鄧麗欣與排球隊隊友提早慶祝，更驚喜落淚！

為球隊仆心仆命的鄧麗欣與隊友打成一片。

Stephy透露會慢慢擴大球隊，最近更請人幫手負責管理層工作：「之前有好多嘢要理，好辛苦。」對於要兼顧拍戲及唱歌工作，Stephy表示會盡量抽時間練波：「好忙但好享受，再老啲打唔郁，趁依家後生打囉！」她直言目標是打上甲組：「月底有區賽，出年就有聯賽，我哋為比賽努力而戰。」