「宇宙最強」甄子丹昨日與新片《葉問3》監製黃百鳴到昂坪市集，宣傳《葉》片及於11月下旬起展出的「葉問體驗館」，子丹興奮地說：「預告片有二百萬點擊率，驚訝又開心！（觀眾餓《葉問》太耐？）其中一個原因，我同個仔去波士頓參觀科學館，有個11歲小朋友大嗌『Ip Man（葉問），I Love You』，喺歐洲好多地方都遇到相同情況，希望觀眾第3集會睇得滿足！」他又笑言感壓力：「拍完第2集諗住唔拍，冇新角度，後來導演葉偉信話諗到加入泰臣同張晉，有新穎、燦爛、突破嘅武打。我係泰臣迷，記得晒佢拳路，但都擔憂佢錯手會點？走錯位點算？兩百幾磅力打埋嚟！我都諗定兩手準備，但合作後發現佢係性情中人，仲做埋好朋友。（網友指泰臣演呢套戲係降Grade？）佢有相當多戲份，唔透露太多，總之唔會令觀眾失望，因為我同葉偉信都係有要求嘅人！」

功夫了得的子丹即席露兩手，盡顯功架！

子丹與太太汪詩詩有影皆雙，大談子女趣事。

另外，子丹昨晚與太太汪詩詩出席晚宴時笑言女兒很愛畫畫，問到可有親手畫一幅人像畫給他？詩詩即搶答：「有畫人像，但係畫Iron Man個演員羅拔唐尼（Robert Downey Jr.）！（老公有冇呷醋？）有！」詩詩又透露懷有第二胎的妹妹圓圓身體狀況佳，而子丹表示如無意外，圓圓亦會現身新片首映。