近百藝員昨晚出席無綫台慶亮燈活動,難得參演台慶劇《梟雄》的黃秋生表示冇諗過爭視帝,直言頒獎予黎耀祥「先啱數」,望造就對方四度稱帝!祥仔則笑言獲影帝加持信心大增,而秋生未有拍攝大合照,企慣中間的祥仔與歐陽震華則因按劇集分組而被迫靠邊站。   文:影視組

秋生未戰先讓位,更點名祥仔稱帝,咁客氣呀?

今年大合照企位是按劇集分組,令祥仔與歐陽震華靠邊站!

Bobby與黃心穎(右)及蝦頭齊齊谷劇。

擔任表演嘉賓的麥明詩(右)與朱晨麗跳得起勁!

視帝競爭激烈,候選視后田蕊妮亦積極備戰。

金剛「禍從口出」叫錯汪明荃做「嘟姐」,即被對方指住話。

無綫昨晚在電視城舉行《迎挑戰 齊向前 TVB48年》台慶亮燈活動,近百藝員包括台慶劇《梟雄》的黃秋生、黎耀祥、湯鎮業、馬國明、《東坡家事》的歐陽震華(Bobby)、王浩信、黃心穎、《無雙譜》的田蕊妮、黃宗澤、岑麗香、《張保仔》的陳展鵬、洪永城和陳凱琳、司儀汪明荃及應屆港姐等現身撐場。

金剛嗌汪明荃「嘟姐」

歌舞表演開場後,秋生先率領《梟》劇演員上台分享,心情大靚的他笑言今次最遺憾是未能與汪明荃合作,否則更加完美,其後三部台慶劇演員分批上台,金剛在台上宣傳《張》劇時竟錯將汪明荃嗌作「嘟姐」(鄭裕玲),汪明荃即發火咆哮:「有冇搞錯!」金剛則以笑遮醜!而應屆港姐冠軍麥明詩未卸任已有不少演出機會,與朱晨麗跳舞助興,相當亮眼!到最後的大合照部分,秋生未有參與,而今年演員企位按劇集分組,正播映的《無》及《張》劇演員獲安排企靚位,故黃宗澤與陳展鵬傍實老闆陳國強及高層李寶安、鄭善強,企慣中間的Bobby及祥仔則靠邊站!

秋生活動前受訪時表示已忘記有否出席過亮燈活動:「係都十幾年前喇!以前好恨去,依家就唔太鍾意。(唔想嚟?)又唔係,唔想就唔到啦!」對於有份爭視帝,他說:「應該冇啩?叫我去頒獎,唔通頒畀自己咩?(你會頒視帝?)咁又未知,想頒畀黎耀祥,咁先啱數,佢幫到TVB,我唔係成日幫到拍劇,做生意條數係咁計,祥仔又真係好戲呢!(視后呢?)事後先講啦!」對於無綫新人湧現,秋生說:「人就多但冇咩人跑出,個個似人哋,複製人咁。」

「頒畀我又唔拘呀」

而擁有兩套台慶劇的祥仔獲秋生睇好即笑說:「佢都戲路縱橫,頒畀我又唔拘呀!高手畀我受寵若驚。(信心又多咗?)影帝加持喎!信心梗係大啲!(再拎就四度稱帝喎!)本來冇所謂,講講吓都覺得好吸引!」提到秋生批評新人欠個人風格,祥仔指新一輩都在溫室長大欠歷練,需時間浸淫,又大讚陳凱琳聰明用功!至於Bobby對爭視帝則抱平常心:「人在做,觀眾在看,公道自在人心,大家鍾意投邊個就邊個。(祥仔係最大對手?)同陳豪、鄭嘉穎、祥仔都識咗好耐,邊個拎都冇所謂,遊戲嚟啫!大家放鬆啲!」

另外,無綫昨日公布人事調動,集團行政總裁助理杜之克由十月一日起升任助理總經理,負責節目部及製作部,而助理總經理區偉林則負責美術部、化妝、髮式及頂峰數碼創作有限公司等運作。無綫集團行政總裁李寶安指是因應市場需求:「呢幾個月啲人對電視嘅要求有所轉變,我哋要做到不受限制、內容多同埋年輕化呢三點,再加上明年要建立第二個平台,工作量大咗,所以要重新分工。」