無綫午間節目《都市閒情》的烹飪主持李錦聯與安德尊向來「火花」四濺，兩人前日「追月」再重逢，一邊煮一邊互窒之餘，安德尊更疑似爆粗！環節開始時，安德尊已與李錦聯「講定數」，叫對方醒醒定定：「嗱師傅，今日中秋，團團圓圓，小心說話！」之後李錦聯腦袋急轉彎，爆出金句：「食咗牛仔骨，唔使亂咁噏！」兩人愈講愈興奮，李錦聯有意無意拍打對方幾下，但可能用力過度，似乎觸動到安德尊神經，並即時反擊，笑笑口指着李錦聯疑似爆粗：「X！師傅！唔好咁大口氣 ，口臭呀！」不少網民聽到安德尊疑似爆粗，笑指雖然火藥味濃，但非常好笑，更有網民留言：「大王（安德尊）忍咗四年終於要爆！」

示範煮餸期間，李錦聯（左）不經意拍中安德尊，搞到對方面燶燶。

安德尊試食時，李錦聯出手拍打其背。