無綫藝員朱慧敏（Queenie）與前EO2成員彭懷安（Eddie）感情拖拉多月，Queenie竟趁昨日中秋佳節發表單身宣言，正式與Eddie斬纜，將他降呢至生意夥伴，呼籲對方另覓所愛，更不惜將之前已預備的酒席撻訂！

回復單身的朱慧敏表示目前未有追求者，一切順其自然。

朱慧敏於中秋佳節決絕地與Eddie斬纜。

朱慧敏（右）

朱慧敏餵粉絲食嘢，在台上與粉絲合照時笑得燦爛，心情大靚。

前EO2成員Eddie於五月中被《好報》拍到夜會索女，因而與女友Queenie情海翻波，期間Eddie出力箍煲，兩人感情一直拖拉。

彼此有情有義

日前Eddie透露華星冰室股東舉行派對，放晒風聲希望人月兩團圓，但Queenie昨日到土瓜灣出席中秋節活動時表示未有出席該股東派對，更發表單身宣言：「好多人陪佢過，總有機會同佢見面，睇緣分啦！祝佢中秋節人月兩團圓，希望佢快啲搵個新女朋友。（正式斬纜？）都持續咗段日子，我哋關係係好朋友同生意夥伴，我哋依家主要傾嘅係工作上嘅嘢！我哋分得好清楚，工作就係工作，生意就係生意。（感情都分得開？）係，依家唔講感情，完全只限工作。（畫上句號？）我哋始終有感情，對大家好有情義，唔想講得太白傷害到對方，我哋一路關係良好、有溝通。」

兩人本已達談婚論嫁階段，Queenie表示早已停止所有婚禮籌備事宜，酒席亦已撻訂，並再向Eddie送祝福：「衷心祝福佢，希望佢快啲搵到第二個，佢都係個好好嘅人。（分咗手？）有啲嘢唔想講到好白，我哋兩個依家係單身。」她稱目前未有追求者，暫時專心工作，問下次會否找個專一男？她再強調很相信Eddie，並力撐Eddie不花心。

朋友陪度中秋

至於回復單身後的中秋，Queenie透露晚上約朋友食飯，想到大坑欣賞舞火龍，前晚已跟另一班朋友首次打台灣牌打通宵。雖然宣布分訊，但Queenie在台上心情大靚與市民玩遊戲，笑得非常燦爛。

對於Queenie的「祝福」，Eddie昨日只透過短訊回覆：「祝大家中秋節快樂。」並配以笑臉圖案，但他又在Facebook上載多張年老夫婦恩愛相片，看來心情相當複雜。

文：影視組