《重播你有Say》廣受圈中人熱捧,他們心水票選的劇集同樣是網上名列前茅的《男親女愛》和《義不容情》,眼光獨到。

黃宗澤

黃心穎

糖妹

陳山聰

黃美棋

黃宗澤:「《男親女愛》係嘟嘟、黃子華最有火花嘅劇集,咪話佢哋有呢個火花係意外,連觀眾都覺得意外,尤其我哋做演員,當年睇嘟嘟最佳拍檔係周潤發,以佢兩位前輩為練習演技對象。依家有子華同嘟嘟嘅配搭,又有另一個驚喜,所以我睇呢個劇好大得着!」

黃心穎:「子華係我嘅男神,佢嘅棟篤笑當時喺溫哥華上演,我都有撲飛。佢同嘟嘟嘅火花又好得意,兩個有口才,鬥嘴時好大火花,如果拍續集就更好!嘟嘟做司儀好出色,但《男親女愛》係我第一次睇嘟嘟演戲,原來可以咁搞笑!」

糖妹:「好想《義不容情》可以重播,因為係26年前作品,當年我得2歲咋!要睇番呢套經典劇,真係好難得,可以睇番黃日華好正氣嘅演技,又可觀摩吓人人都話好奸嘅溫兆倫演得究竟有幾衰,仲有好靚嘅周海媚出道嗰個樣!」

陳山聰:「10套經典劇入面最鍾意《義不容情》,雖然當時好細個,睇到溫兆倫嗰種演技,奸到出汗,奸角係由嗰時開始興起,呢套劇亦令我有時演奸角都會拎番出嚟睇。」

黃美棋:「《男親女愛》好吸引,黃子華拍劇唔多,套劇播時帶出小強潮,子華同小強喺劇中做朋友,實際生活冇可能,所以呢套劇好特別,而佢同鄭裕玲兩位水溝油嘅人走埋一齊好Sweet,所以好想睇番!」