《東網巨星》App就無綫深宵劇場重播經典劇，推出《重播你有 Say》作全民投票。繼第一階段後，第二階段緊接由有份參演10套經典劇的演員進行拉票後，至今仍以鄭裕玲及黃子華的喜劇《男親女愛》遙遙領先，兩位主角連聲感謝大眾支持。文：影視組

《男親女愛》令人引頸以待，嘟嘟大感開心，更多謝觀眾支持。

林家棟

鄭少秋

最強娛樂資訊App《東網巨星》於Facebook推出的《重播你有Say》嚴選無綫10套無綫經典劇，讓網民投票選出「經典之最」，10套經典劇的總瀏覽量為66,749次。鄭裕玲（嘟嘟）與黃子華的《男親女愛》，由第一階段啟動至昨晚，兩階段共錄得1,189個Likes，瀏覽量更高達13,234次，成績斐然。事隔15年，《男》劇仍深受愛戴，嘟嘟說：「一套劇拍咗成十幾年都仲有咁多人投票同鍾意，梗係開心啦！多謝觀眾支持。其實拍嗰時台前幕後有商有量，所以先有咁好效果。當年呢部劇一邊拍一邊播，可以睇到觀眾鍾意邊部分而再去加強，係着數咗嘅。」身為男主角的子華亦透過電話回應：「多謝大家支持。（拍嗰時有咩難忘事？）太多喇！數之不盡，我有時都會上互聯網重溫番啲片段。」

而票數截止至昨晚，由黃日華、劉嘉玲主演的《義不容情》及古天樂、宣萱主演的《尋秦記》分別獲753個Likes及519個Likes名列亞及季軍。至於瀏覽量方面則由《尋秦記》（共11,745次）及《義不容情》（共10,674次）穩守第2、3位。

無綫節目部總監杜之克就是次投票回應：「無綫會跟足呢次嘅票選結果，投數最高嗰套會緊接《大鬧廣昌隆》，鐵定喺10月5日深宵時段播出。黃金時段以外嘅劇集票選，觀眾反應仍然咁好畀到我哋一個啟發，日後我哋會喺電視同網絡上都會多啲同觀眾互動。」

林家棟落力拉票

另外，《大鬧廣昌隆》將於10月2日播出大結局，前晚收視4點約有26萬觀眾收看，該劇男主角林家棟，以及深宵劇場「鐵膽」鄭少秋（其主演的《大時代》及《誓不低頭》早前掀起重播熱）亦呼籲大家落力投票。家棟更抵死說：「相信大家睇緊《大》劇，跟住想睇邊套？我有心水，但係呢度唔講住，你哋快啲去投票啦！」投票連結《 http://on.cc/tvbdrama 》