十套經典劇重播的候選中，套套鬥得激烈，其餘五套的演員亦落力「拉票」，並有精彩回憶逐個講。

《刑事偵緝檔案》陶大宇：「呢個劇名副其實係經典，拍出破案手法常規，當劇本係偵探小說咁睇，亦係無綫破天荒一年內播第一及第二輯而寫下紀錄，最難忘係拍攝四個月中，日日只係瞓得3、4個鐘，攰到對白要逐句拍！」

《新紥師兄》關禮傑：「《新紥師兄》講述一班年輕人為追求理想要做好警察，我個『好姐』角色都好深入民心！要睇劉青雲、梁朝偉、呂方同我以前可愛嘅樣，一定要支持啦！」

《執到寶》甘國亮：「1980年同王家衛、林奕華一齊編劇嘅《執到寶》，我哋覺得係溫情喜劇，當年喜劇泰斗劉克宣由頭帶到尾，宣叔離開咗我哋三十二年，如果呢個劇重播，或者佢係會嚟你屋企同你一齊睇！」

《孖仔孖心肝》陳秀雯：「周星馳呢個對手接唔到囉！佢反應另類，有場戲我做姊妹着低胸喱士裙，我用圍巾包住，星仔見到話『唔使嘛！』我會諗係我冇身材唔使遮呢，定係心口唔低唔使遮呢？」

《壹號皇庭》歐陽震華：「法庭戲好認真，離開法庭就唔同晒，好似雙重性格咁，幾嬉皮笑臉，好調皮，我同大宇好多即興對白，總之唔離開原本意思，加到嘅都加，觀眾就係鍾意咁！」