時下流行的3D立體蛋糕令無數女生一見愛上，就連演得又唱得的李璧琦（Becky）都要向高難度挑戰，親手製作這款睇得又食得的蛋糕！原來Becky私下亦是煮得之人，更大爆愛為每一任男友整All Day Breakfast，認真Sweet！

李璧琦入得廚房出得廳堂，整3D立體蛋糕一定冇難度！

自作「業」，冇難度！
Step 1
將底層蛋糕預先焗好，把糖皮搓扁，再用麵粉棍壓平至圓形。

Step 2
將糖皮鋪上蛋糕，用糖皮工具壓至貼服，並將多餘的糖皮切除。

Step 3
將糖皮填滿各種不同種類的矽膠模，然後取出待乾。

Step 4
將水及食用色膏混合，然後用顏色掃在倒模上塗上食用色膏待乾。

Step 5
將已乾透的倒模裝飾及糖珠黏在上、下層蛋糕上並以鐵線固定，並將上下層蛋糕合上。

完成

文：伍凱頤　攝：嚴偉國

李璧琦向來形象高貴大方，原來私下愛下廚，自言煮「鹹嘢」多的她，在其生日派對上見到賣相華麗的3D立體蛋糕便一見愛上，於是她在蛋糕導師Elizabeth的指導下，大整3D立體蛋糕，雖然這款蛋糕製作難度高又費時，但對於藝術科攞A的她來說卻一點難度都沒有，望着用心製作的製成品，她說：「呢個蛋糕完全係一件藝術品，唔係為咗食，係為咗靚，好似依家去餐廳都係食景唔係食嘢。3D蛋糕依家真係好Hit，因為平時啲蛋糕好多Cream，感覺好肥膩同埋好易變形，而3D蛋糕係用糖皮嚟做，可以企得好穩，感覺冇咁嘥心機，整完之後又可以摸吓同擺吓，不過壞處就係唔捨得食！」

為男友炮製愛心餐

整蛋糕對Becky來說冇難度，煮家常小菜更是Easy Job，而新加坡菜更是她最拿手的菜式，她說：「我喺新加坡住過一段時間，我又好鍾意食海鮮，以前一得閒就跟當地朋友學整新加坡菜，最拿手係炒蟹，肉骨茶嗰啲對我都毫無難度，同埋我覺得整嘢食好好玩，又鍾意熱鬧，因為我好細食，成日煮完都食唔晒，所以一有時間就會請朋友上嚟屋企開Party，我負責做大廚，多啲人一齊Share美食就最開心！」她更自爆愛為每一任男友煮愛心餐，最愛為他們整All Day Breakfast：「All Day Breakfast有非常多款式，唔使怕悶，同埋為愛人煮早餐特別Sweet！」

Becky多年來一直Keep着纖瘦身材，秘訣是「每朝一杯熱水」，她說：「一起身飲一杯熱水對清腸胃真係好有用，好多女仔同我講有便秘問題，但我係完全冇便秘，去廁所亦好暢順。之前我都試過飲7日瘦身蔬菜湯，中間唔可以飲甜嘢同有氣飲品，唔食碳水化合物，呢個方法好幫助排毒，我飲完之後仲瘦咗4磅！我通常一年會飲一次，不過飲嗰陣你會成日聽到啲腸蠕動得好大聲，有次我同陳豪拍對手戲，無啦啦聽到好大嘅咕嚕聲，全場即刻爆笑，阿Mo（陳豪）以為我肚餓，仲即刻叫我食咗個蛋糕，真係諗起都好笑！」

除了飲水外，Becky擅長的聲樂亦對健康有幫助，她說：「唱聲樂都係一種帶氧運動，熱身嗰陣會做好多同抖氣有關嘅嘢，抖氣會抖得深，好似瑜伽、跑步、太極全部都好講究抖氣抖得夠唔夠深，如果呼吸夠深，肺活量好啲，吸收嘅氧氣多啲，個人亦會精神啲，仲可以瞓得好啲！」

狂攝時間旅行散心

談到興趣，Becky笑言有空便會旅行：「之前去咗意大利拍旅遊特輯，跟住又去日本拍節目，又同屋企人去沖繩，Keep住去旅行所以好開心，我鍾意去旅行嘅程度係誇張到，每次有朋友去旅行都會向我請教食買玩攻略，佢哋諗住我周圍都已經去過晒！最近我仲去咗越南，嗰陣有兩套劇疊埋，得三日空檔，但我都照衝咗去越南歎Resort同食嘢，總之一見到有時間我就會去旅行！」