轉戰主持的黃紫盈（Connie）昨日與邵仲衡（David）及王賢誌出席三皇集團舉行的全新「古漢養生精」發布會，首次拍廣告的Connie自爆被放生電的David電到暈：「佢好Charming，畀佢電到廣告都拍唔成！」文：影視組

黃紫盈自爆被邵仲衡的「生電」電到廣告都拍唔成！

豎起拇指的黃紫盈大讚王賢誌（左）及邵仲衡兩位型男都好Charm。

前無綫新聞小花黃紫盈、邵仲衡及三皇集團有限公司董事總經理王賢誌，昨日在九龍城出席三皇集團舉行的全新「古漢養生精」發布會。首度為品牌拍廣告的Connie自爆被拍檔David電到暈：「佢好厲害，今次我要交少少戲，雖然David話生得我出，但佢好Charming，畀佢電到廣告都拍唔成！哈哈！佢都有Guide我演出。」問到是否不停NG，她表示為拍廣告苦練笑容：「有，但唔算多，都幾順利，我向來都慣咗露齒笑，今次有照鏡練吓含蓄啲笑。」

自誇健康有衝勁

同場的David透露重新活躍幕前後睡眠質素欠佳：「活躍番五個月，開頭都唔慣，休息得唔係咁好，但我食咗產品就瞓到流口水，流到枕頭都濕埋！」問到未適應忙碌工作的他有否其他健康問題，代言補腎產品的他笑言有衝勁：「我做運動都好密，算成日做Gym！至於我喺其他方面就不嬲有衝勁。（老婆讚你叻？）唔話你聽！（老婆受惠？）OK！」

狂接Job豬籠入水

問到密密工作是否豬籠入水，David笑言「幾好生意」：「近期為漫畫拍廣告扮火雲邪神，化咗三個鐘妝，好好玩！仲有其他財務同保險公司廣告，幾好生意！可能我年紀老，咁人口老化令我有市場。（賺幾位數？）酬勞滿意，錢嘅多少就唔係首要。」