樂壇新人羅啟聰自被伯樂方樹樑發掘後，在機緣巧合下獲音樂人林一峰為其新歌作曲填詞，他揚言這首歌是他與逝去的愛犬Rocky唯一連繫！

K.I.S一直堅持在街頭表演，為的只是讓更多人認識他的音樂。

在唱歌的道路上，K.I.S自認是個幸運兒。

K.I.S憑歌寄意，紀念愛犬。

樂壇新人羅啟聰（K.I.S）自被資深音樂人方樹樑發掘後，一直不停練歌及結他，無間斷地與樂隊In Spring在街頭表演，回饋粉絲之餘又過過歌癮。先後推出歌曲《東角遊民》、《荔枝山Rocky》的他即使音樂工作日漸繁重，仍堅持街頭騷：「我哋其實一有時間就會出街騷，因為想多啲人聽到我嘅歌，而且個氣氛好好，又可以見到聽眾第一個反應！依家仲多咗商場、戶外騷搵我哋，成功感好大！」

機緣遇上林一峰

由模特兒轉型歌手的他星途可算是一帆風順，不但獲伯樂方樹樑提攜，又有樂隊In Spring作「Back-up」，其後更有林一峰為其新歌《荔枝山Rocky》作曲填詞，對於種種「機緣」，他坦言是個幸運兒：「其實真係冇諗過可以走得咁遠，開頭都知呢條路難行，自己本身接觸嘅音樂種類又唔係多，都係靠方樹樑引導，後嚟再報Course進修音樂，出咗第一首歌嗰陣其實已經好開心，冇耐又喺公司撞到林一峰同佢講咗幾句，之後佢就話作咗《荔枝山Rocky》呢首歌畀我，真係好好彩！」

提到歌曲《荔枝山Rocky》，K.I.S即表示這首歌是他與過身愛犬Rocky的唯一連繫：「Rocky由我十歲嗰時就陪到我依家，當初知道佢有病嗰陣真係好無助，只可以盡量用晒啲時間陪佢，而呢首歌就記錄咗我同佢之間嘅回憶，所以對我嚟講好有意義！」問到對於日後發展有何憧憬，他笑說：「可以紅到點我真係唔敢諗，我只係想將來可能喺好遠好遠嘅地方都有人識唱或者聽過我嘅歌，同埋希望有一日可以同我嘅偶像Jason Mraz合唱，呢個可以話係我一個小小願望。」

文：Cindy　

攝：黎志輝