因拍攝無綫節目《食平3D》而上契的陸浩明（六號）和肥媽瑪利亞，最近齊齊「搵食」，獲客戶邀拍龜苓膏電視廣告。據知該廣告原本只邀請肥媽一人，後來她點名要與契仔六號合作，故六號笑言獲契媽帶挈賺錢非常開心，稍後更要練定歌追隨她走埠登台。

肥媽連拍廣告都要帶埋六號，母子檔搵真銀！

肥媽同六號譜出母子情，遲吓仲話要一齊登台。

《食平3D》中，肥媽同六號經常鬥嘴，但其實感情極好！

六號與肥媽在無綫節目《食平3D》中拍出真感情，二人上契後，作為契媽的肥媽原獲廣告商單獨邀請拍攝龜苓膏電視廣告，但肥媽一向愛錫契仔六號，故特別要求廣告商加邀六號齊齊擔任代言人，實行有錢齊齊搵，令六號感激不已。

練定歌等登台

拍攝廣告當日，導演對這對契母子的火花相當欣賞。六號和肥媽交足貨，於廣告中滲入不少二人於節目《食平3D》的鬥嘴和互窒元素，令廣告入屋而且生動。

六號於電話受訪時笑稱多謝肥媽的帶挈：「酬金好好，拍攝又順利，廣告商好滿意，所以我好多謝肥媽！廣告商仲贊助我食好多龜苓膏，我梗係要益埋家人朋友啦！（賺得多？）今年我拍咗三個廣告，成績都算好好。遲啲肥媽仲叫我學定歌跟佢去登台，佢係『登台王』嘛，我都好想跟佢搵食！」

文：影視組