最叻扮嘢和搞笑的阮兆祥扮過無數人物，但他卻自認從未能把哪一個扮得最出色：「我永遠想下一個扮嘅係最好！」經常拍劇的他更認為一生中最重要的角色是「兒子」，希望不斷增加在媽媽心中的分數，亦感謝觀眾多年來對他的不離不棄。

阮兆祥

祥仔以歌手身份出道，雖然無繼續發展，但佢自言從未放棄。

祥仔（中）話《福祿壽》帶到正能量比人之餘，亦為佢帶嚟好兄弟王祖藍（左）同李思捷（右）。

觀眾印象中的阮兆祥是一位扮嘢能手，扮過無數人物的他是一個不會回頭望的人：「我冇最拿手嘅角色，永遠只想下一個做嘅係最好！超越自己先畀到我滿足感，好多喺大家心目中好有個人特色嘅人物其實都扮晒，我哋一輯入面扮七十幾個藝人，有共鳴嘅實有機會重覆去扮，但一定要超越上一次嘅相似度同深度，令大家覺得你有進步！」

祥仔亦承認《福祿壽》對他的重要性，是演藝生涯中的里程碑：「係我演藝歷程入面一份上天送畀我嘅大禮物，又識到兩個好兄弟，做出嚟嘅嘢同我哋最初理念一樣，分開之後又有自己獨立發展空間，但過咗一段時間再聚埋一齊，又再帶正能量畀大家！大家起初都覺得呢啲組合好快散，但由開始到依家，我哋3兄弟都仍然一條心，我好高興同感恩！」

實力派歌手冇難度

出現於多套戲劇的祥仔認為，要演得好的角色只有一個：「係做一個兒子！一生入面做好多角色，但如果本身喺現實生活做人哋個仔都做唔好嘅話真係冇用，我當然唔敢講我係個滿分嘅兒子，但我希望用有限嘅時間多多關心媽咪，好想突破自己喺佢心入面嘅分數！（最想多謝媽咪？）想多謝嘅人好多，包括一直以嚟畀機會我嘅觀眾，冇佢哋Support，做嘅一切都只係枉然！」

起初以歌手身份出道的祥仔提醒大家，他一直都有新作品，對音樂的熱誠亦從未減退：「我仍然Consider自己係一個歌手，仍然好鍾意音樂。依家想同人分享音樂有好多唔同嘅媒介，唔一定要出實體碟，我可能會喺每次嘅表演，趁住唔同嘅主題去表演啲新嘅音樂作品。」

髮型：Eddy Kwong　

化妝：Jonas Yeung　

場地：Mango Tree