外表斯文的「宅男女神」陳瀅自言性格火爆，更擁有跆拳道「黑帶」的功力！她透露學拳除了因有靚仔睇外，最重要是能保護自己，更自爆曾在港鐵被非禮致留下陰影，一度只敢搭巴士！

有跆拳道底子的陳瀅做出高難度動作，功架十足！

鄭俊弘擺出瑜伽動作，咦？似乎有啲生硬噃！

林德信着住牛仔褲都「能屈能伸」，果然係導師！

陳瀅和鄭俊弘昨日出席牛仔褲活動，獲同場的瑜伽導師林德信教瑜伽動作，並即場示範。陳瀅透露讀書時人稱肥妹，故會做高溫瑜伽減肥：「依家臀部同大腿係肥胖重災區。」她透露將拍港產警匪片，問到是否打得之人？她笑說：「我學跆拳道，接近黑帶，細個已經學，當時因為武館好多靚仔師兄。」

從此轉搭巴士

陳瀅又憶述讀書時在港鐵被非禮一事：「試過喺港鐵畀人摸Pat Pat，當時好多人，我感覺到Pat Pat有嘢震緊，但嗰陣太逼，到下個站落車，有兩個女仔用眼神示意我係（被非禮），你知女仔同女仔之間會有種默契。（條褲後面有冇污糟？）唔知，都隔咗咁耐，所以後來都唔會搭港鐵，寧願坐巴士。」而鄭俊弘則透露曾學功夫，談到TVB不少小生花旦相繼離巢，要召喚新人回朝加簽約？他說：「冇喎，冇召喚我，可能因為我仲有好幾年約。（如果叫你加簽約？）要傾吓細節囉！」

六位數拍廣告

另外，陳瀅自拍了全裸寫真後，工作量大增，近日獲瘦身品牌垂青，以六位數酬勞擔任Image Girl拍平面廣告。她在廣告中換了逾六套服裝，當中不乏騷纖腰及長腿的造型。