任賢齊、黃家強、蘇永康和梁漢文昨日以「男人幫」名義舉行演唱會記者會，受訪前因梁漢文的擾攘影響訪問，其餘三子緊貼早前謝賢在記者會怒摑曾江事件，隨即模仿，明要抽盡「4個小生」水！

蘇永康（左起）、梁漢文、黃家強及任賢齊在記者會上開定香檳，當然想演唱會賣個滿堂紅啦！

蘇永康（左起）、任賢齊、黃家強及梁漢文扮「4個小生」抽水，又扮得幾似喎！

梁漢文、任賢齊及黃家強海陸兩路拍短片造勢。

任賢齊與黃家強甚受歡迎，粉絲爭住握手！

歌手任賢齊、黃家強、蘇永康和梁漢文組成組合「男人幫」，於11月27至29日在紅館舉行《男人幫演唱會2015香港站》。四子昨日以機師Look開記者會，記者會結束後，梁漢文擾攘一會才正式受訪，其餘三子立即抽乾「4個小生」，蘇永康笑說：「我好似謝賢咁星巴佢（梁漢文）！」至於揸收音咪的小齊亦抽埋一份，問道：「揸咪嗰個叫咩名話？」

反轉豬肚就係屎！

作為唱片公司老闆的小齊受訪時指巡唱並非為賺錢，被記者踢爆曾視「男人幫」為搖錢樹，他解釋：「如果受歡迎，仲有登台商演可以賺到錢嘛！」問到會否重蹈組合BIG FOUR覆轍？家強笑指BIG FOUR是純賺錢，蘇永康亦認同：「BIG FOUR百分百商業化，『He Ha Hea』四首歌就話出騷啦！」梁漢文也加把口說：「賺盡，咪過男人幫囉！反轉豬肚就係屎呀！」

家強講阿Paul有骨

談到家強加入「男人幫」的原因是否因樂隊Beyond合體無望？他直言：「唔關事，Beyond永遠開唔到騷更加要搞，依家我咁講，我可以反口，呢個世界有幾多反口覆舌的人。」然而當蘇永康指有意請Beyond成員葉世榮及黃貫中（Paul）做嘉賓時，家強話中「有骨」地說：「阿Paul淨係同你Jam歌得啦！」蘇永康即打圓場：「又得，我同佢合作過，有乜所謂！」

文：音樂組　

攝：鄭家俊