張繼聰擔正的新劇反應不俗，他昨日現身宣傳時透露，太太謝安琪每晚趕住返家捧場，囝囝亦畀面學唱主題曲，但他對角逐視帝不敢多想！

張繼聰表示老婆謝安琪追看其新劇，囝囝更識唱主唱曲。

林夏薇老公看過其演出後，戥她在劇中的角色慘。

林夏薇大受長者歡迎，有婆婆更攬實她錫。

楊明（左起）和韋家雄等與長者玩遊戲。

張繼聰、林夏薇和楊明等昨日到老人院宣傳新劇《收規華》，眾人與長者打成一片，既玩猜燈謎又大派月餅，阿聰更表演口技扮拉二胡，引得大家笑聲不斷，事後他自嘲唔靚仔，故只能以另類技能搭夠。

謝安琪力撐

談到新劇反應不俗，阿聰表示太太謝安琪及囝囝也有捧場：「個仔開始識唱首主題曲，佢好少唱我啲歌，太太就每晚趕返屋企睇，又會Send WhatsApp話我知邊場感動，聽聞有網友話套劇係佢哋心目中嘅最佳劇集，我都好開心！（年底爭獎？）獎邊有得爭，係眾望所歸。（會唔會拉票？）呢啲好尷尬，我唔會咁做！」問到有否信心入圍角逐視帝？阿聰笑說：「諗起都腳軟，平常心啦！之後啲台慶劇都係頂級前輩演，到時可以坐隔籬，偷偷哋Selfie已經滿足。」

林夏薇逼老公睇

而夏薇於現場大受歡迎，更被長者攬住錫，她透露半夜也有逼老公重溫該劇：「因為我個角色好慘，佢睇完瞓唔着，前兩集好少少，點知尋晚又慘過。（佢有冇叫你唔好做？）又冇，互相支持啦！」對於該劇被網民捧為「最佳劇集」，夏薇興奮地說：「太開心，其實拍呢套劇學到嘢，拍嗰時我仲專登去石塘咀了解歷史添！」至於楊明則表示忙於拍攝新劇《巨輪2》，稍後更要到澳門拍外景一個月。

文：影視組