盛君遇跟蹤狂喊驚

文：關穎賢　攝：劉斌

影壇新寵盛君身材高挑，身材平均之餘更擁有42吋長腿，配上甜美清純的外表，成功俘虜一眾宅男，成為新一代女神。Janelle於2012年被黃百鳴睇中，簽約成為旗下藝人，一年多後已經夥拍男神林峯，擔任電影的第一女主角，其後亦跟古天樂及林家棟等好戲之人有連場對手戲，火速上位成為影壇搶手貨！

清純女神賣肉No

談到現時娛樂圈有很多女新人為上位搏到盡，拍三級電影、影大膽寫真、露肉，樣樣齊，問到能否接受激情床上戲時，Janelle怕醜地表示試過拍Kiss戲，但還未試過演激烈床上戲：「如果拍出嚟畫面好靚，我係可以接受得到！」問到可會挑戰性感底線？她則力保清純女神形象說：「我覺得冇人搵自己做Sexy嘅角色，我都唔係嗰個類型，嚟緊繼續會拍多啲動作戲！」她透露正在橫店及東北拍一套抗日背景的愛情電影，更會飾演山寨頭領，戲中有大量危險場面，例如策騎、打鬥及爆破等。所謂巾幗不讓鬚眉，雖然Janelle看起來弱質纖纖，但原來鍾情武術，還學過跆拳道及太極，拍戲時亦接觸過不同類別的武術，更一試難忘！她覺得過往演的都是一些挑戰性比較大的角色，反而最想接拍愛情小品：「想挑戰吓需要細膩啲去處理嘅角色，因為平時自己都比較文靜。」除了拍電影之外，原來Janelle唱歌都有一手，最近還推出了首隻單曲，密謀進軍樂壇，做個全能藝人。

孤身來港冇朋友

Janelle兩年前孤身移居香港，人生路不熟，加上在香港沒有朋友，要學習獨立，生活上有太多細節要顧及，沒有家人在身邊的她，那種無助非筆墨可以形容：「有件事真係好慘，啱啱嚟到都唔知道有咩好食，屋企樓下有間馬來西亞餐廳，我食嗰間餐廳食足1年！因為我唔識路，間餐廳又近屋企，所以一喺屋企就會去嗰間餐廳。」幸好後來在工作期間遇到熱心的工作夥伴，不時會帶她搵好嘢食，還帶她到街市買新鮮食材回家煮番幾味，Janelle認為在外面用餐味精太重，始終要好好管理健康，所以一個人住必須要學懂下廚，而她的拿手菜式都是簡單的西餐。

在港這段時間要獨自居住，Janelle為了工作只能硬着頭皮撐下去，更曾遇過麻煩事！她回想有次獨自回家時，遇上陌生男子跟蹤：「記得之前喺尖沙咀住，有次返屋企前去超市買嘢，返到屋企樓下，就有陌生男人同我講嘢，最初以為佢係住客，點知佢話只係嚟香港旅遊，話喺我買嘢嘅時候（目及）中我。佢想識我，仲想要我電話，搞到我好驚！之後我即刻返上樓，但佢就繼續喺樓下等咗好耐！」經過此事，她坦言每次獨自回家都要加倍小心。問到可有衝動找個男朋友保護？Janelle自言性格一向比較害羞，所以放假時都選擇留在家中，是一個典型的「宅女」，而且在香港好像沒有機會認識到一些啱嘴形的朋友。但提到香港男士，她立即大讚有Taste：「佢哋好識得享受生活，無論衣着同打扮都好有品味，識食識玩，如果遇到啱傾都會考慮發展吓!」Janelle又大膽剖白愛情觀，原來她一直憧憬童話式的愛情，樣貌和身形都不是最重要的條件：「淨係想搵到一個可以明白自己，有思想交流，亦可以照顧我、愛我嘅人，而我都好期待有一個咁嘅人出現喺自己生命裏面！」

錯嘴形 幾帥都冇用

當遇上心儀對象可會主動出擊？Janelle笑說：「我比較怕醜，但如果真係鍾意嗰個人就會表現出嚟，對方一定會睇得出，但若果對方都冇行動嘅話，我就會放棄！其實都有遇過一啲唔錯嘅男仔，但總係覺得唔係好溝通到咁，女仔好鍾意人哋估吓自己諗緊咩。」她坦言身為女人，就算表面裝得有多強，其實都很需要安全感，而且獨自在港經常會感到寂寞：「會好掛住屋企人，想有個依靠，所以都好期待白馬王子嘅來臨！」