《東網電視》節目《娛樂onShow》主持俞詠文（Angela）請來歌手張崇基及張崇德擔任嘉賓，崇德自爆曾被宣傳人員以衫掟面而「兩泡眼淚谷住」！而崇基則拒做怪獸家長，即使囝囝考第尾都冇所謂，只要開心就得。

崇德（右）與崇基積極備戰即將舉行的演唱會。

崇德受訪時讚栢芝有魅力，崇基則表示拒做怪獸家長。

崇德（右起）、崇基與Angela一起練聲，非常投契。

張崇基及張崇德上《娛樂onShow》接受主持俞詠文訪問，即將開騷的張氏兄弟，以「基會難德」為名開演唱會已有10年，但期間曾多次改名，崇德說：「轉過幾次名都冇人記得，叫過無印少年、Zoom，最後都係叫番崇基崇德啦！」

接受囝囝考第尾

談到崇基在書展期間推出新書《娛樂圈.九》，自爆娛樂圈的血淚史，原來崇德曾被宣傳人員當場落面：「有一次去電台活動，個體育館入面有個更衣室，電台人員就大聲話有T-shirt派畀大家，每個公司都派代表去拎衫，我哋仲好乖，諗住行去搵宣傳人員拎衫，嗰個宣傳人員一件衫掟落我塊面，嗰陣我兩泡眼淚谷住。」

他兩兄弟都已為人父，崇基自言拒做怪獸家長：「好鍾意湊B，換尿片我好鍾意。（畀個仔入名校？）絕對唔會，每間學校有人考第尾，就畀佢考啦！真係冇所謂呀！只要佢真係學習到，搵到佢興趣就得！」

讚張栢芝有魅力

身為張栢芝老友的崇德則大讚栢芝魅力沒法擋：「佢去每一個地方，所有人都同佢影相，慶幸都有幾個人搵我影。有次我哋去食自助餐，我話你唔使食喇！佢話啱啱想出去拎頭盤，沿路已經不斷有人搵佢影相。」想知道崇基崇德更多嘢？快啲Click入《東網》睇實《娛樂onShow》啦！

文：專案組