出爐港姐冠軍麥明詩為十優狀元兼畢業於劍橋法律系，成績優異，惟她昨日出席活動時自爆足足考了四次車牌，首次考車「肥佬」更是她人生中第一個考試不合格。　　文：影視組

學業成績彪炳的麥明詩，考足四次車牌才Pass，令她耿耿於懷。

還未成功考取車牌的龐卓欣有機會「反贏」麥明詩，難怪她講到笑逐顏開！

應屆港姐郭嘉文（右起）、龐卓欣與麥明詩齊齊出席頒獎活動。

應屆香港小姐麥明詩、龐卓欣及郭嘉文昨日到灣仔出席頒獎活動頒贈凌志名車，向來贏慣的麥明詩講到考車牌即「自暴其短」：「總共考咗四次，人生第一次肥佬就係考車牌，當時超唔開心，唔習慣考試唔合格。第一次考棍波，之後轉番自動波，考咗三次先考到！」

男友唔隨傳隨到

麥明詩指怕塞車會忟憎，因而不會駕車：「屋企得一架車，都係爸爸用嚟返工，有時一齊出街都會畀我揸，架車好舊，有乜損傷都唔怕。（男友接送仲好？）你講的士司機？的士司機就隨傳隨到。（緋聞男友林作呢？）個個朋友都好忙，邊可以隨傳隨到！（識個司機好過男友？）係。（近期畀朋友笑唔夠成熟？）由參選開始已畀朋友抽到乾塘！」

龐卓欣望威番次

由讀書到選港姐均是麥明詩手下敗將的龐卓欣，考過一次車牌卻失敗，但總算大有機會贏番次，她笑說：「終於有樣嘢可以叻過佢，都諗住再考，唔使麻煩屋企人接送。（男友Solomon經常接送？）係，好似我私人司機咁，但佢好樂意嘅。」至於冇車牌的郭嘉文現乘港鐵、巴士出入，問到可有市民認出她而帶來不便？她說：「可能冇化妝，暫時都冇人認得。」問到可有興趣考車牌，駕車代步？她說：「有時趕時間都要搭的士，所以都想考，有信心一Take過。」