視帝陳豪昨日亮相新劇造型記者會，劇中題材涉及婚外情，陳豪被問與老婆陳茵媺可曾出現感情矛盾，嚇得他即時搵木門框，連聲大嗌：「Touchwood！」而被拍得湊仔游水的他，更自讚泳褲Look「陽光又漂亮」！ 文：影視組

多番合作的陳豪與邵美琪於劇中飾演夫婦。

黃智賢於劇中將介入陳豪與邵美琪之間。

陳豪與Aimee榮升兩子之母後，夫婦恩愛不減。

陳豪、邵美琪（Maggie）與黃智賢等昨日到電視城出席新劇《完美叛侶》（暫名）造型記者會，陳豪與Maggie默契十足，拍照時更攬頭攬髻。

大仔適應返Playgroup

陳豪早前與老婆陳茵媺（Aimee）湊仔游水的大隻Look不復見，西裝骨骨的他反而消瘦不少，他說：「冇特別再減，係之前拍完《潮流教主》Keep住。（泳褲Look曝光？）冇諗過我個肉身會畀人影咗，係咪好漂亮？好陽光？我好多年冇掂泳池，嗰日係帶小朋友熟習水性。大仔已經返緊Playgroup，好適應。（抽空去馬來西亞探同杜汶澤拍戲嘅Aimee？）等個劇開咗先，再睇吓有冇時間。」

邵美琪做等愛的女人

另外，早前與施祖男分手的Maggie被問有冇追求者，她說：「有，喺劇入面！（現實呢？）你要問番追求者。（Feel唔到？）感情問題唔好講啦，都唔好玩，係唔識答！（同施祖男有冇聯絡？再見亦是朋友？）唔講呢啲，唔識答！（套劇講婚外情，有冇令你怕咗結婚？）冇，因為會Happy Ending，我做嘅係等愛的女人。（現實中都想尋覓愛？）梗係，人需要愛，就算我拎住呢個咪，都要愛惜佢，愛係唔可以畀名利減低。」