屈居亞軍的龐卓欣（Ada）向來信心爆棚，但今次敗給Louisa，Ada認為對方是實至名歸，但直指對方也有比不上自己的地方：「我諗我喺參選過程比Louisa輕鬆，我放得好開，佢比較多啲嘢諗，我諗呢個係我優勝過佢嘅地方。」未能登頂，但Ada從容面對得失並笑說：「得到第二，好開心我唔使選華姐，可以放肆咁食嘢！」雖然屈居第二，她卻自覺有贏，贏的是最難能可貴的友誼：「人愈大好難搵到真心朋友，好慶幸12個女仔都係一班會戥你開心嘅朋友，我冇諗過有呢種緣分！」

龐卓欣

大方認愛：畀安全感

由參選開始，「寸嘴Ada」予人高傲、冷艷的感覺，但Ada認為只是自己心直口快，不喜歡轉彎抹角：「做自己最舒服！」她還是罕有不介意公開男友身份的佳麗，她笑說：「我覺得大方承認有男友，係可以畀到安全感對方嘅方法。可能參選後會多咗粉絲或者追求者，但至少大家都知我係有男友。」

音樂系畢業的Ada，決賽當日與藝人李璧琦合唱，一鳴驚人，Ada坦言有想過做歌手，還以歌手鄧紫棋（G.E.M.）為目標：「自己好鍾意鄧紫棋，覺得佢唱現場好感動，更重要嘅係佢對歌唱嘅熱誠令我好欣賞！我本身對古典音樂有認識，都想可以靠自己分享古典音樂畀人。」不過，Ada指目前不會規限發展方向：「當然拍劇做戲都想試吓，我亦有諗過做Youtuber，可能教吓人化妝，或者分享我唱歌嘅片段！」