麥明詩龐卓欣「友緣」在心中

冠軍麥明詩 參選受壓 三度落淚

擁有一張無可挑剔的CV，麥明詩（Louisa）以大熱姿態勝出，擊敗曾是同窗、由細鬥到大的龐卓欣（Ada），選完不用講大話，Louisa直言對方是最好朋友：「其實咁多位佳麗入面，我應該同Ada最好朋友，可能覺得同佢好有緣，同埋我哋背景好似。」

直到Louisa成功摘后，仍有指兩人繼續鬥，今次則玩「鬥多朋友」。提到奪冠後被指沒有佳麗上前抱抱成為一時話題，更被指「冇朋友」、「無敵是最寂寞」等，Louisa以三字金言回應：「在心中！」並坦言沒有因此感失落：「其實我心知事實唔係咁，所以唔會好介懷，我不嬲同佢哋乜都傾，傾減肥、夢想、壓力，咩都講！」

「鏡頭後都係平常人」

既是十優狀元又是劍橋畢業生，Louisa可謂歷屆學歷最高的港姐之一，更被賦予「最屈機港姐」與「貴族港姐」等稱號，但她卻多次強調只是個平凡女生：「其實我鏡頭後都係一個好平常嘅女仔啫！鍾意同朋友唱吓K、食吓嘢同睇吓戲咁。」掛着「尖子」之名參選，雖然能增加勝出機會，但這些卻是Louisa最大的壓力來源。自認從小在溫室長大的她坦承，多次因外界輿論而壓力爆燈：「我覺得外界對我期望好大，認為我可以好有智慧咁答每條問題，但其實我都唔係好有智慧，我都淨係識考試同識溫書啫！」

「對我要求太苛刻」

Louisa又自爆在參選期間因壓力而先後喊過三次：「第一次係剛剛參選嗰陣，外界猜度我點解要參選，覺得有種受委屈同有口難言嘅感覺，加上擔心屋企人嘅私生活受到干擾；第二次係我開始經常面對傳媒，試過幾次失言，我覺得我都係普通人，大家好似對我要求太苛刻；第三次喊係因為傳出我同跳舞老師麥秋成嘅緋聞，我諗係咪因為我嘅言行唔夠小心呢？」

被認為是「人生勝利組」的Louisa，原來覺得自己仍有事未做，她說：「人生仲有好多挑戰，唔一定要係比賽，例如叫我去非洲或者北極兩個月，或者去攀喜瑪拉雅山對我嚟講都係一個大挑戰。」而她亦封另一位「人生勝利組」愛瑪沃森（Emma Watsons）為偶像：「Emma既要面對傳媒，同時又能兼顧到自己追求嘅生活環境，喺呢個複雜環境下都冇迷失自我，仲會好勇敢去發聲！」