美國人氣搖滾樂隊Maroon 5前晚再度襲港開騷，眾港星現身撐場，容祖兒與男友劉浩龍低調拍拖睇騷，雖然搵好友徐濠縈與愛女陳康堤做「擋箭牌」，但最後仍忘形化身小粉絲合拍起舞！

祖兒（右二）與劉浩龍（左一）找來徐濠縈及康堤做「擋箭牌」才合照。

祖兒與劉浩龍結伴睇騷，初時隔住朋友，其後愈行愈埋聞歌起舞，更與友人玩自拍！

祖兒與劉浩龍被記者發現時，尷尬彈開。

Maroon 5在港開騷，主音Adam盡騷唱功。

G.E.M.邊睇騷邊揈手打拍子！

文：外娛組

格林美音樂獎得主Maroon 5前晚在亞洲國際博覽館開騷，齊齊戴帽的祖兒與劉浩龍（師兄）拍住徐濠縈及康堤低調入場，祖兒被記者發現時一度尷尬彈開，隨後肯影合照亦攬實康堤隔開男友，而「國際漿」鄧紫棋（G.E.M.）一早走入控制台準備睇騷。

愈行愈埋冧到爆

現場9成爆滿，早前剷青的靚仔主音Adam Levine晚上9時出場即惹來全場粉絲尖叫，祖兒與師兄在控制台睇騷初時都隔住好友「零交流」，但到中段時，二人就情不自禁打破好友「防線」愈行愈埋密密斟，更默契十足化身小粉絲，跟住大熱歌曲《Move Like Jagger》起舞，舉手狂揈動作一致頻頻互動，祖兒不時冧笑，完場前又與友人大玩自拍，似乎相當盡興！而G.E.M.則邊睇邊狂揈手打拍子！

Adam拋水樽畀粉絲

Adam當晚一口氣唱足6首歌曲才與粉絲打招呼，全晚唱足個半小時晒盡假音高音，唱盡人氣歌曲《Daylight》、《Maps》及《Payphone》等，亦有拎起姣爆的粉紅結他騷Quali，搞到尖叫連場，Adam更識做將外套及水樽拋落台給粉絲留念，樂隊最後以《Sugar》作結，但未有演唱憑電影《一切從音樂再開始》（Begin Again）唱到街知巷聞的《Lost Stars》。

另外，有粉絲一完騷就嫌時間太短而大叫「回水」！早前有門票被黃牛黨炒高3倍出售，未知受害粉絲會否更覺唔夠喉？