「牛雜妹」Monnie領軍做Angel

早前因參選港姐而一夜成名的Monnie，即被多間公司睇中，搶閘殺入娛樂圈，首個工作便是為《東網》推出新App《馬場BOSS》做Angel，拍攝宣傳片與硬照。拍攝當日，Monnie需要在沒有任何提示下對鏡頭讀出約1分鐘的宣傳對白。第一Take錄影時，Monnie順利讀出預先提供的對白，但因緊張及生硬，需要繼續拍多幾Take，但再試五、六次仍出現少許失誤，好似背錯台詞或食螺絲等，搞到「耍晒冧」！問到有否特別花長時間背台詞？她笑說：「都冇嘅，係正式Roll機有少少緊張，驚NG阻大家收工。」

擺甫士自認生硬

休息過後，回復信心的Monnie向在場工作人員揚言：「呢次係最後一Take！」終於拍攝成功，但為求做到最好，她特別要求再拍多一次做後備：「始終係第一個工作，希望出嚟嘅效果會令人覺得專業！」每次拍攝，Monnie都很在意鏡頭裏的自己會否影得太肥，自言會繼續Keep Fit。輪到影相環節，Monnie直認因較少接觸影相而緊張：「覺得自己擺甫士有啲生硬，嚟緊要買多啲雜誌，睇多啲Model點擺！」當穿起校服拍照時她笑說：「做兼職Model多數係化妝嘅Job，從來冇試過玩Cosplay！」

吸金買千呎豪宅

率性的Monnie坦言入行就是想成名，還一直有個業主夢，希望買大屋令爹哋媽咪住得舒服：「自己有個目標，希望三年內可以搵到第一桶金，可以嘅話可以畀到千呎豪宅嘅首期。我知距離目標仲有十萬八千里，但我會努力！」談到今次是入行首個工作，Monnie說：「每樣嘢都係從未接觸過，覺得好新奇、好有挑戰性同好好玩！雖然一開始唔熟悉下有啲蝦碌，但我相信多啲練習，可以愈做愈好！」

講到未來發展，Monnie透露希望專注演戲：「希望拍多啲唔同嘅電影，摸索吓邊類型角色適合自己，亦希望做主持。其實最想試演悲情戲，雖然難度高，但如果投入到角色就好有成就感。（係咪好易喊？）其實我係典型水瓶座嘅人，喜怒無常又易喊，睇段感人故事都喊得出！」

文：甄之慧　

攝：吳文聰