《MTV音樂錄影帶頒獎禮》未如格林美音樂獎規定女星密實上陣，前日不少歌手名模齊齊Big爆紅地氈，另有歌手出招行型格搶鏡！

Britney Spears（Labourjoisie）寶刀未老

現年33歲的Britney以Sharp爆金色透視迷你裙大晒收身成果，大方晒生了兩個仔後「重見天日」的纖腰，上圍更谷到上頸，「胸湧」吸睛，有傳媒指造型似名曲《Toxic》MV打扮，寶刀未老！

Rita Ora（Vera Wang）施「毛」術

一向作風大膽的Rita以全黑吊帶連身裙示人，Deep V開到落肚臍，真空上陣大露左右半球，下身再配高衩設計晒長腿，性感之餘以羽毛裙襬添加少女味，輕易成搶眼之最！

Gigi Hadid（Emilia Wickstead）撞色銅人

上位人氣模Gigi前日以黃色Deep V連身裙現身，大方晒豐滿上圍，下身更中門大開晒長腿，不過噴上一身古銅膚色被嘲太重手，與裙身撞色！

Karlie Kloss老貓燒鬚

名模Karlie最愛簡約打扮，不時着出型格氣息，雖然今次以一襲橙色背心裙上陣略為露肉，不過未見高貴感覺，被彈失手！

Vanessa Hudgens（Naeem Khan）愛心公主

外貌甜美的迪士尼女星Vanessa一身粉紅繡花裙大賣可愛，襯上曲髮打扮似足公主，加上於場內溫馨抱起狗仔合影，騷埋內在美！

Emily Ratajkowski（Altuzarra）消失的長腿

出名身材Fit爆的Emily雖然深知「長處」，以黑金色Deep V高衩裙打出心口，不過襯長Boot就令長腿望落「短一截」，略見突兀！

Cara Delevingne（Saint Laurent）星光熠熠

着慣靚衫的名 模Cara一向冇甩拖，今次於隆重場合改以剪裁簡單的連身裙上陣，裙身綴以閃爆星形圖案，憑清新氣息輕易跑出！

Selena Gomez一雪前恥

早前被笑翻脹的Selena近期一心Keep Fit，穿黑色長袖貼身裙密實示人，見盡曲線，型格十足，成功雪恥！

Amber Rose & Blac Chyna粗俗搶鏡

真人騷女星Amber與Blac雖以姊妹Look上陣，不過最搶眼莫過於服飾上印有粗俗及「妓女」等字眼，美感欠奉，純以騎呢搶鏡！