新人陳詩欣（Eunice）連續兩次被模特兒公司獵中，自言命中注定「食呢行飯」，但新人有苦未敢言，拍MV差點暈倒天台。文：音樂組　攝：黎志輝

陳詩欣轉型做歌手，追尋夢想。

新進歌手陳詩欣（Eunice）從歌唱比賽中找到自我，毅然由模特兒轉型為歌手，踏上追夢之路。Eunice憶述當時在街頭被模特兒公司老闆獵中，以為是街頭騙案所以未有理會：「嗰陣行行吓街，有人問我做唔做Model，我以為係呃人，點知第二次學校有Model比賽，嗰陣我做MC，又再遇番上次嗰個人，原來佢係老闆，佢又問我做唔做Model，我覺得真係好有緣，所以就做咗Model。」起初家人得悉Eunice入職模特兒公司後都擔心女兒被騙，幸好Eunice細心解釋後，家人釋懷並轉為支持她，Eunice說：「依家屋企人都好支持我，媽媽仲成日煲湯畀我飲，屋企人仲喺WhatsApp到叫其他親戚多多支持我。」

感情不拖拉

Eunice揚言要走悲情路線，為此打造「悲情三部曲」，第一首派台歌《感情戲》，講述男友有外遇，而女生卻逃避現實，問到有否相似經歷？她說：「咁我又未試過，通常都係和平分手，我個人好理智，如果發生呢啲事我會好決絕，唔會拖拖拉拉！」她自言感情史很少，最深刻一次要追溯到中學時期，當時她與男同學正在曖昧階段，在學校大家裝作不認識，其後每天放學又趕回家「煲電話粥」，可惜這段感情無疾而終，她表示仍然回味這段「你估我，我估你」般兩小無猜的感情。

畏高險暈倒

談及早前拍攝《感情戲》MV，Eunice大爆當時因為是新人關係，未敢提出自己畏高，以致當日幾乎暈倒天台：「嗰日本身都好順利，但張導演（張子丰）話要補多個鏡頭，佢叫我喺天台個石壆上面行，嗰度仲要冇圍欄！但我係新人又唔想咁多要求，惟有頂硬上。」