有「綠葉王」之稱的姜皓文因經常扮「大佬」而被定型，近期他成功轉型，憑藉多年的浸淫，現在扮演任何角色都能獨當一面，只要劇本寫得好，他不介意做強姦犯：「佢點解要強姦人，一定要有前文後理，咁我做咩角色都OK！」

姜皓文減肥Fit爆，Chok型甫冇難度！

演戲經驗豐富的姜皓文，對甚麼角色都手到拿來！

姜皓文（黑仔）入行近30年，坦言因經常扮演「大佬」而被定型，至近期開始「轉型」做慈父，他指「轉型」非刻意：「好多觀眾睇慣咗我做兇神惡煞嘅角色，當我做番啲善良嘅角色佢哋就睇唔慣，甚至行內朋友將我定型咗做『大佬』，見到我唔係着黑西裝黑眼鏡呢啲就想笑。自己唔會刻意想轉型，但一路想試唔同角色，想睇吓黑社會大佬做唔做到新嘢！」

戲短都有價值

就算再扮「大佬」，黑仔都要有「思想」：「最近接咗個角色，雖然都係有啲社團背景，但係有思想嘅人！例如我去做綁匪，原來佢背後係要照顧老人癡呆嘅嫲嫲，咁我就會好想去做，有得變化同發揮！」一向有「綠葉王」之稱的他做過很多出色的配角，黑仔坦言不介意這個稱號：「冇乜放上心，只係觀眾心目中睇我嘅一個位置，一部戲點去分主角同配角其實係分唔到，只係大家有唔同嘅線，我嘅戲只係短啲，對個團隊都有價值，自己亦唔會介意戲份多少，但會睇我喺套戲入面嘅發揮，你就算叫我做一個強姦犯又得，但要去睇個角色係點變成一個強姦犯，一定要有前文後理，咁我做咩角色都OK。」

減肥Fit到爆

由以前「肥胖」形象變成今日Fit爆的他，黑仔笑言朋友以為他患病：「到目前為止都冇反彈，我成日都Keep住磅，限住自己喺幾磅左右。當時短時間內Fit咗好多，身邊啲人個個都用奇怪眼光望住我，仲問我係咪病咗？辛唔辛苦？又話唔得o架、你唔可以咁樣o架、好傷身o架、你有冇唔開心呀？會有抑鬱症o架！」他又說：「飲食方面好重要，再加運動。之前曾經試過肥到185磅，都因為健康問題想減番啲，而且唔想做咩角色都係肥佬咁，就把心一橫去減！」