歌手何韻詩以出品人身份自資籌辦演唱會，她透露曾多次入紙申請紅館被拒，故改於十八區的場地舉行：「開頭我諗可能真係冇期，唔質疑繼續申請，申請到第二十次都唔批就開始有啲問號。」阿詩今次一反傳統不找贊助商，實行「香港人撐香港人」，只靠門票收益作營運成本，更為縮減成本而碌爆人情卡：「差落一條人情街數，因為有啲場地只容納到十幾個觀眾，冇可能為收支平衡收一萬蚊一張飛，如果大家次次計我人工，我成副身家拎出嚟都未必做到，好感激大家仗義幫忙同打個折！」

何韻詩即使開騷多阻滯，但仍堅持夢想向前衝！