SuperGirls日前到吉隆坡出席活動時狂掃美食，更即興玩踢爆「扮內訌」，被爆狂摸肌男的Cheronna反寸隊友：「佢哋夠讚人哋皮光肉滑，好似前世未見過男人咁！」文：影視組

Jessica被寸後即揮拳打Cheronna，扮嘅啫！SG真貪玩！

SG大擦肉骨茶，又到處遊覽買手信。

Aka大啖食，咁瘦食極都唔怕肥啦！

Heidi捧住椰青慢慢飲，好清涼呀！

索女組合Super Girls（SG）早前到吉隆坡亮相娛樂公司開幕活動，完騷後即把握機會大擦肉骨茶及狂掃肉乾做手信。她們透露於當地密集式工作，不但為多間雜誌拍攝硬照，更接受不同電台及電視訪問。

前世未見過男仔

當中成員Jessica大爆Cheronna拍攝雜誌硬照期間，狂摸大隻男模的腹肌：「我哋平時拍MV都冇男主角，今次係第一次五對一同男仔拍硬照，所以有成員就乘機摸吓佢！」Cheronna聞言則反寸隊友「前世未見過男仔」：「我應攝影師要求就好大膽咁摸佢，不過影完後佢哋就狂摸人哋啲肌肉，讚人哋皮光肉滑咁！」語畢貪玩的SG當街「扮內訌」，Jessica揮拳大鬧Cheronna，而其他成員Heidi、Yanny及Aka就立即上前慰問玩作一團，非常搞笑！

戴臍環要槍斃

談到於當地工作有何難忘事？Heidi大爆要全程赤腳受訪：「電台訪問都唔可以着鞋，佢哋好注意衞生！」至於穿臍環的Jessica則自爆被當地工作人員「嚇餐飽」：「佢哋出鏡唔可以戴臍環，男仔甚至唔可以戴耳環！工作人員仲講笑嚇我話犯規要槍斃，嚇到我即刻除咗佢！」