糖妹（黃山怡）日前接受東網電視《娛樂onShow》訪問時賣花讚花香，宣傳新推出的CD及旅遊書《台北細細步》，除了分享新書的製作過程及台灣旅遊必到之處外，亦公開一粒星難度的擇偶條件！

糖妹遊台時冒住會暴肥嘅風險，樣樣美食都試勻，十分用心！

糖妹難以接受與圈內人拍拖，咁要問問Dominic喇！

糖妹上《娛樂onShow》向主持陳振安分享新書的製作過程及遊台貼士。

文：專案組

歌手兼新進作家糖妹日前擔任東網電視《娛樂onShow》嘉賓，接受主持陳振安訪問。提到早前推出的旅遊書《台北細細步》，她坦言滿意銷量：「賣得唔錯！書展第3日就已經知道賣咗5,000本，依家未知最新個數，但知道原來咁多人對我寫嘅旅遊資訊咁有興趣，覺得好開心！亦有人係因為入面隻CD去買，因為我都好耐冇推出3首歌以上嘅碟，今次呢隻有4首歌！」

最愛葱油餅

書中介紹了逾百個景點及美食，糖妹堅稱全部試過，更大讚是一本「誠實的書」：「入面所有嘢我都食咗，如果唔啱食我唔會寫入去，係本好誠實嘅書！」她又推介必吃小食：「係我一世人食過最好食嘅葱油餅，廿蚊台幣咋！好抵呀！佢長期排隊，喺當地好出名，好多人一買就買十個以上，佢舖頭叫『溫州街蘿蔔絲達人』，但我就麻麻哋佢個蘿蔔絲餅。佢係一間百幾呎嘅小屋，有4個人塞喺入面，你會見到佢哋喺度搓粉搓麵糰同加葱，隔籬嗰個就用熱嘅油鑊炸，炸完即刻食真係脆卜卜，啲葱嘅香味更揮發出嚟！如果你想食得再啜核啲就加隻蛋，喺炸好嘅葱油餅上面，隻蛋即刻熟，再放入個口，嘩！真係不得了！」

拒戀圈內人

被主持笑「過多幾年就係中女」的糖妹自爆對男友的要求：「身高矮過我真係唔得，高過我好易啫！當你試過同圈內人拍拖，你就會知真係好煩！」想知更多糖妹製作旅遊書的有趣過程，留意東網電視《娛樂onShow》啦！