Zayn暗寸Taylor貪錢男友Calvin粗口反擊

前日前英國人氣組合One Direction（1D）成員Zayn在社交網站轉發一篇有關兩位小天后Taylor Swift與Miley Cyrus對網上音樂串流服務Spotify睇法的文章，當中以Miley唔志在搵錢的言論暗寸Taylor拒絕將歌曲放在Spotify全因不滿冇錢賺，Zayn更留言：「個落差真係令人驚奇。」暗寸Taylor搞音樂只為向錢看。

「小心你棚牙畀人打甩」

留言一出，Taylor男友Calvin Harris即心急護女友，爆粗說：「你賺夠錢啦嘛？正啦！但仲有9成9嘅音樂人要靠這些音樂串流服務維生，如果你唔明一個成功歌手點樣為其他音樂人爭取權益，唔該你唔X好出聲。其實仲有好多好X慘嘅人喺地下室為你創作新歌，希望靠此維生。」

早有積怨借題發揮？

Zayn亦不甘示弱，扯晒火回應：「唔係針對Taylor，所以我建議你冷靜小小，小心你棚牙畀人打甩。」雖然二人不久後都刪除了留言，而Calvin更道歉示好，但Zayn似乎亦唔多受落，繼續爆粗鬧對方。

有指Zayn今次突然向Taylor開火是因為不滿對方上周六請了他前未婚妻Perrie Edwards的女子組合Little Mix當演唱會嘉賓，而且二人早在Taylor與1D仔Harry Styles拍拖時已積怨，因為Zayn不滿Taylor成日擺姿態，無意示好所致。至於早已跟Zayn反面的1D仔Louis Tomlinson亦趁罵戰將Calvin的爆粗留言加入「我的最愛」，乘機加一腳踩Zayn。