形象嚴肅的汪明荃昨日出席節目記者會時向「謝賢怒摑曾江」事件「抽水」，與鄭少秋（秋官）「重演」事件，突然扮嬲兼衝向秋官面前「揈水髮」，嚇到秋官呆咗！

汪明荃「嬲爆爆」走到秋官面前揈水髮，慘被「摑中」的他嚇到O嘴！

汪明荃推開勸交嘅胡楓……係胡渭康至真。

汪明荃與秋官一攬泯恩仇，如果謝賢同曾江係咁就好。

謝賢怒摑曾江事件。

汪明荃、鄭少秋（秋官）與胡渭康等昨日出席節目《Sunday靚聲王》記者會，汪明荃搞笑地「重演」謝賢怒摑曾江事件！起初，汪明荃受訪時表示得悉掌摑事件，但未有細看片段，以為只是節目宣傳：「一把年紀都咁火爆好少見，希望我到時唔係咁啦！（見過謝賢發火？）冇！佢好斯文，曾江就冇咩合作，但佢都冇乜嘢！」當聽聞另一小生Joe Junior當時專業地收音，她即忍不住笑說：「佢有冇嚇到手震呀？」而當她得知《4個小生去旅行》有十集時即說：「唔怪得咁躁！拍咁耐，老人家辛苦呀！（如果搵你拍《4個花旦去旅行》？）我唔鍾意真人騷，呢啲錢唔係我賺，我比較重視私隱。」

攬錫「平息」事件

完成訪問後，汪明荃見秋官尚未到場即作狀扮嬲說：「秋官仲未嚟？我真係想發火喇！」其後秋官到場，她即「嚟料」衝前及拆甩髮髻，走到對方面前轉身揈頭髮，並笑說：「佢打我呀！有冇搞錯！」未知因由的秋官嚇到呆晒，而「勸交」的胡渭康更被她推開！最後，汪明荃叫秋官為她整理髮髻，他乖乖照做，最後更攬攬錫面合照「平息」事件。

怕被打拒加入

事後問到可有嚇親？秋官笑說：「咪咁啦！咁犧牲自己形象，可能佢呢排做慣大戲未放得低。」他又自爆當初Joe Junior曾提議他加入《4個小生》，但最終未有成事：「我唔想做阿四，又唔想好似阿四咁畀人打喎！（怕太辛苦？）講笑啫！但聽人講個節目要服侍人，我都想要人服侍喎！依家佢哋有晒宣傳效果，呢招高招呀！連阿姐都偷橋。（覺得謝賢同曾江為人點？）曾江講說話一向大聲，但佢學識高不時提點人，至於謝賢更加冇見過佢真發火！（同汪明荃拍旅遊節目？）咁咪要全程服侍佢？」

文：影視組