女星姚樂怡昨日在微博宣布懷孕四個多月，穿Tube Top的她拍下凸肚照，昨日受訪時表示剛照完BB結構，一切正常，但之前有很多孕婦症而被嚇親，現時終穩定下來，故大感安心。樂怡透露懷孕初期冇嘔，卻出現皮膚敏感、多氣及失眠的情況，更足足瘦了五、六磅：「之前好得意，準時到夜晚六點個肚就好多氣，頂住咁，好似飲完汽水咁不斷有氣，又唔知係咪補得滯，成日生痱滋，最慘係皮膚敏感，因為啲朋友教我搽妊娠紋膏，胸同肚都要搽，點知搽得太多而敏感，周圍一撻撻紅色，睇咗好多次專科醫生，喺診所喊咗出嚟，每晚好似有一萬隻蟻喺身上行咁，依家終於有覺好瞓！」問到腹中塊肉是男還是女時，她說：「冇所謂啦！仔女我哋都鍾意。」

姚樂怡穿Tube Top晒凸肚，正期待新生命的來臨！