無綫新一代咪神陳婉衡（Alycia）昨日出席活動彎腰倒奶，「胸」贏同場的黃翠如及雨僑，她更賣大包擘髀做一字馬，難得她還自嘲：「我個Body好唔Balance！」 文：影視組

陳婉衡烏低身做運動，證明「咪神」封號當之無愧！

黃翠如出盡力踢腿搶鏡，春光危危乎！

雨僑騷長腿一樣輸！

陳婉衡（Alycia）、黃翠如、雨僑及林德信（Alex）昨日到數碼港出席活動，被封為無綫新一代咪神的Alycia與翠如及雨僑跟隨教練做踢腿及拉筋等熱身運動，Alycia非常落力，彎腰倒奶再擘髀、賣大包做一字馬。她坦言不抗拒被封「咪神」：「冇所謂，畀多個Term人記得自己啫！（做咪神工作量增？）冇特別唔同。（酬勞加咗？）唔知，交畀公司處理。健康嘅性感，我冇所謂，泳衣騷都OK，但要早啲通知，等我準備，早輪少運動，唔做運動一排，我啲肉就鬆，個Body好唔Balance。（你左右唔平衡？）唔係，係我下身比較重，要做運動Balance。（去人多場合唔驚人手多多？）我做娛樂主播時習慣晒！（多咗人撩你？）唔覺喎！」

輸家自嘲運動「敲門級」

翠如也認輸，坦承缺乏運動細胞：「我唔係入門級咁渣，而係敲門級！我全家運動都唔叻，我細個身體唔好，氣管差，少運動，依家做番。（男友蕭正楠陪你？）佢忙工作。（傳無綫高層余詠珊為撐你踢走草蜢，等你密密主持《超強選擇1分鐘》？）係草蜢要出埠，之前錢嘉樂生日，佢哋要攝時間到，佢三個好多嘢做，好難請得郁。（觀眾話你做主持木獨？）森美都話有錢嘉樂喺度，我又唔叻，作用係畀人笑吓咋，我唔介意，我每日都畀人話，話完我就檢討、反省，之後再不斷循環，我已經免疫。」而林德信示範瑜伽，他說：「叻玩瑜伽女藝人唔少，但男藝人好似冇乜。（同爸爸林子祥比邊個Fit？）梗係佢，我未見過佢肥，好欣賞佢！如果我60歲好似佢咁，我都願！」