無綫劇集《拆局專家》演員錢嘉樂、黃智雯、洪天明與朱千雪等昨日現身油塘宣傳，嘉樂笑言近日收到不少好消息：「《超強選擇1分鐘》啱啱送咗100萬，收視有22、23點，而《拆》劇監製話套劇有26、27點收視，真係如釋重負。」提到近日播出與黃智雯的鴛鴦戲水戲令劇迷熱議，嘉樂自爆未有向太太湯盈盈備案：「佢都係演員，明白係劇集需要。（再有激情戲？）咁激都唔夠？」而智雯亦笑言沒有向男友交代。

錢嘉樂與洪天明即場Chok甫，氹得朱千雪笑不停。

錢嘉樂笑言與黃智雯的鴛鴦戲水戲已是全劇最激！

錢嘉樂拍激情戲，事前竟冇向湯盈盈備案。

至於天明分享湊仔樂，笑言細仔出生後令生活轉變大：「每日6、7點就起身送TJ（洪大仁）上校車，細仔又唔放心畀晒工人湊，兩邊行嚟行去，日日都係瞓3、4粒鐘。」被問到會否再追女？他口風一改笑言會再考慮。同場的朱千雪被指遭「肌男」黃宗澤力追，她笑言比較喜歡書生男。

另外，天明日前抽空與太太及大仔TJ欣賞魔術Show，自爆曾為吸引女仔埋身而希望成為魔術師，今時今日依然想學魔術：「當然唔係用嚟氹女仔，係想學魔術氹小朋友！」