昨日是鄭嘉穎46歲生日，但因身在內地而未能與女友陳凱琳（Grace）一同慶祝，拍拖後首度過生日便分隔兩地！Grace未感失望，還透露踏正零時便打電話隔空祝賀，更學定煲湯為嘉穎滋補，幸福到漏！文：名人組

自認廚藝渣的陳凱琳為嘉穎學煲湯，愛情嘅魔力真係神奇！

陳凱琳席上與蛋糕合照，快啲Send畀嘉穎當慶祝啦！

陳凱琳獲贈情侶手鈪，睇嚟嘉穎又多一樣生日禮物！

陳凱琳諗定約嘉穎食飯補祝生日，唔知會否又被撞破呢？

月前公開「穎琳戀」的鄭嘉穎昨日46歲生日，女友陳凱琳昨午出席品牌活動成焦點，問到如何為男友慶祝拍拖後首個生日？她透露男友正在橫店工作，晚上她則要拍劇而未能拍拖慶祝：「我喺12點打畀佢講咗生日快樂！我又買咗有心思嘅禮物，乜嘢就係秘密，等佢下個月返嚟親手送畀佢。」至於會否「人肉速遞」？她聞言即說不，因為劇集要拍到12月中。

靠視像維繫感情

拍拖後嘉穎的首個生日雖未能及時慶祝，但Grace坦言不失望：「唔會！工作重要，會食飯補祝。（親自下廚？）我煮嘢好渣，但學緊煲湯。」有女友的滋補愛心靚湯，嘉穎一定甜到漏！席上，Grace獲大會送贈情侶手鈪，問到會否送給男友箍住對方？她笑說：「唔係！手鈪好有意思。（送情侶戒指？）我會好好安排。」至於有否掛住男友？她笑言好彩因有工開，可以專注工作，平日則靠視像通話維繫感情。

隔空送「愛心蛋糕」

另外，Grace昨日凌晨在Instagram轉載一張嘴上沾有忌廉的BB仔相，更加附生日蛋糕及心心的符號，擺明當正男友是寶貝仔，送上愛的祝福。