前港姐冠軍李珊珊多年前以代言人身份拍攝大膽玩蛇硬照，身為「前輩」的她大讚雨僑毫不簡單：「女仔好少咁大膽！同埋除咗顧住條蛇惡唔惡外，仲要注意衞生問題，因為啲蛇會無啦啦瀨屎，啲屎仲臭過公廁！」她笑着建議如果雨僑手上的蛇瀨屎，應該即時扔向身邊的男生。重提當年影玩蛇相，她坦言原定拍檔是大蟒蛇：「但係佢太靜態，所以用過山烏，但係毒蛇嚟。」深感害怕的她要求與毒蛇先相處一日定定驚：「拍嗰時要同佢對望，要有眼神交流，但係佢無啦啦啄過嚟，我就即刻避，但都啄中『魂精』，好彩佢個口封實咗咋！」

李珊珊曾與毒蛇過山烏拍攝硬照，更要眼神交流，認真大膽。

JC與黃色大蛇拍照時心驚膽戰，全程不敢郁動。

另外，名模Jessica C.（JC）2013年推出寫真時，亦赤裸裸與一條黃色大蛇拍照，不怕蛇的她放在身上時亦心驚膽戰：「我喺美國時有朋友養蛇，都有玩過，影寫真時因為全裸上陣，條蛇喺身上郁動，所以好驚，唔敢郁，怕激嬲條蛇。嗰次拍攝都高難度，又要保持個靚樣，又驚走光，個心又驚。（點樣衝破心理關口？）多啲同條蛇玩，摸吓佢，條蛇好溫馴。」