曾備受無綫力捧的苟芸慧因甲狀腺問題被迫停工，有傳近九個月零工作完全冇收入，約滿無綫的她更因「唔夠騷」而被要求賠償六位數差額，令她決心轉型，將積蓄數十萬元投資點心舖！提到賠錢問題，她回應時支吾以對不欲多談，反而講到點心舖即笑晒口！

戴眼鏡、化淡妝的苟芸慧現身點心舖親自打點。

正學習烹飪的苟芸慧行經廚具舖亦不忘研究新產品。

苟芸慧在放滿碗碟的餐桌前又抹又執，認真落力。

樂易玲透露苟姑娘稍後將返加拿大接受手術，並希望她康復後回來再衝刺。

文：影視組

曾是無綫力捧花旦之一的2009年華姐冠軍苟芸慧，深得宅男歡心，加上與天王郭富城及鄭嘉穎傳緋聞，高峰期騷價由3萬元升至10萬元，可惜前年起受甲狀腺問題困擾，令身形愈見腫脹，一度暴升至170磅，工作被迫叫停，更傳出近九個月更是零工作零收入！

親自招呼食客

「淡出」幕前的苟芸慧日前被《好報》拍到現身尖沙咀某商場內的點心舖，只見戴眼鏡、化淡妝的她，身形清減不少，先走到放滿碗碟的餐桌前又抹又執，接着Set枱擺好碗筷，看來非常熟手。其後她與職員研究宣傳牌擺位，又到收銀櫃翻閱帳簿，期間有食客要求服務，她亦親自招呼，被食客認出後仍繼續親民笑晒口！據知，慳儉的苟芸慧早已儲落大筆積蓄，並膽粗粗一擲數十萬元，與朋友合資點心店「点心代表」，希望在演藝事業低潮時開拓一條新血路，由「螢幕女神」轉型「點心女神」！此外，據知早前苟芸慧約滿無綫，無綫以「唔夠騷」為由，要求她賠償六位數差額，經過多次傾談後，無綫作出讓步，讓她以放假形式延長合約直至十月中，同時讓她認真思考去向，六位數賠償金亦可暫時Hold住。

返加拿大做手術

對於被指欠騷要賠錢給無綫，苟芸慧接受電話訪問時支吾以對：「呢方面唔想講太多喇！但公司都好錫我。（係咪投資咗幾十萬開點心舖？）哈哈！遲啲大家就會知啦！依家保持神秘。」問到放長假如何打發時間？她笑說：「周圍搵嘢學，好似中文，賽車就啱啱考咗個牌，好開心，同埋有學烹飪囉！」

而無綫高層樂易玲昨日就苟芸慧因跑數不足而九個月冇收入作出回應：「佢係包薪，但咁多年佢幫公司搵嘅錢係多過公司包佢嘅錢，所以冇Under Show，佢依家都有出糧，只不過係放假，遲啲佢會返加拿大接受手術，佢都希望康復（甲狀腺問題）就返嚟再衝刺！（有指某客戶指定搵苟姑娘嘅工作都被無綫推卻？）係有客戶好錫佢，指定想佢做，而我哋都會勸導，但苟姑娘始終想以最佳狀態示人，所以我哋都唔可以勉強！」