陳琪繼細女早前撼爆眼角後，大女芷苓日前到新加坡旅行時又被房門夾爆手指公，嚇得陳琪9秒9帶女求診，由於擔心手指骨受損，返港後再求診，相反丈夫胡諾言表現冷靜，認為小朋友受傷乃成長必經階段，還安撫陳琪毋須過分憂心。

陳琪與胡諾言帶兩個寶貝女去新加坡玩！

被夾爆手指公的陳琪大女，包紮傷口後又笑番！

胡諾言陪女兒餵大象。

一家四口與卡通人物合照，盡享家庭樂。

視兩個女為命根的陳琪，趁暑假兼丈夫胡諾言拍完新劇返港，一家四口到新加坡旅行5天，對於經常到當地的兩位小公主來說儼如返鄉下般熟悉，玩得相當盡興。

陪魔鬼魚游水

每次必到景點絕對是主題樂園，由於細女身高未能通過，所以機動遊戲統統沒有她份，令她非常失落！陳琪說：「細妹好慘，好似咩都冇玩過咁，大女就好開心，佢又大膽，同埋佢男仔頭，鍾意Transformers，所以今次買咗好多呢方面嘅嘢，我老公就好擔心，叫佢不如揀個公仔買，但家姐唔肯，反而買咗8、9歲玩嘅Lego返去砌，最終砌唔掂咪我哋同佢砌囉！」除了到主題樂園，陳琪還帶一對女兒餵大象及與魔鬼魚一同游泳。由於胡諾言早前忙於在內地拍劇，故趁今次旅程補償做爸爸的責任。

流血痛到喊

不過，期間發生小插曲，大女芷苓與細妹爭東西，混亂間被酒店房門夾爆手指公。陳琪說：「家姐係咁喊，因為好痛，又流好多血，我即刻帶佢睇醫生，老公又唔係好緊張，話個個細個時都夾過，所以冇事嘅，仲話唔使睇醫生，但我就擔心，帶佢睇完之後，返香港落機再睇多次，好在佢只係表皮受損，傷口幾日都仲有少少血水出，個手指公位就黑晒，冇辦法。（嬲咗個妹？）唔會，係家姐自己夾到。」對於兩姊妹接住受傷，陳琪不諱言朋友建議她看風水，不過她認為意外難避免，日後會加倍小心睇實寶貝女。

文：影視組